Shillong, Nailur:
Ka Hynñiewtrep National Youth Movement (HNYM) ha ka Sngi Ba-ar ka la leit ban aiti da ka dorkhas ha u Symbud Myntri Rangbah ka jylla bad uba dei u Myntri ba dei khmih ïa ka tnad Pynroi Sor ka jylla, u Bah Sniawbhalang Dhar ban dawa na ka sorkar ba ka dei ban pynsangeh noh mardor ïa ka jingthmu ban pynlong jaka theh ñiut ha Lumsohlait jong ka shnong Nonghali halor ka nongrim ba katei ka jaka theh ñiut ka dei kaba jngai tang kumba 500 metre na ka jaka ba shong ba sah ki briew.
Haba kren sha ki lad pathai khubor, u President ka seng, u Bah Louis Dohtdong, u la ong ba hadien ba ka seng ka la leit ban peit dalade ïa katei ka jaka kaba ka sorkar ka thmu ban pynlong ka jaka theh ñiut, ka la lap ba katei ka jaka ka long kaba itynnad bad kaba lah ban pynlong kum ka jaka jngoh kai pyrthei, hynrei kaba sngewsih ka long pat ba na ka liang ka sorkar ka la leit ban pynbiej ïa ka Dorbar Shnong bad ïa ki paidbah ba kan wanrah ïa katei ka jaka theh ñiut bad thied ïa katei ka jaka haduh 200 acre ka jaka ha ka dor kaba T.52 shi square feet.
U Bah Dohtdong u la ong ba ka seng hi ka pyrshah jur ïa kane ka jingthmu jong ka sorkar ban pynlong jaka ñiut ha Nonghali, hynrei kum ka sorkar ka dei ban pynbha ïa ka marten kaba don ha Mawïong namar ba ki jaka ha Ri Khasi kim dei ki jaka ki ban shu ïadie ïathied ha ka kyrteng jong ka roi ka par katba ki paidbah pat hadien habud kin sah khlem jaka khlem puta.
U Bah Dohtdong u la ong ba katei ka jingpyrshah jong ka seng ka long halor ka nongrim ba katkum ka Waste Management Act, ka jaka theh ñiut ka dei ban long kaba jngai haduh 800 metre na ka jaka ba shong ba sah ki briew, hynrei katei ka jaka ha Nonghali na shnong sha Lumsohlait ka jngai tang kumba 300 ne 200 metre eiei.
“Kum ka seng, ngi ïeng skhem halor ka nongrim ba ngin nym ailad ïano ïano ruh ban ïathied ïapet ïa ka khyndew kaba dei jong u paidbah”, la ong u Bah Dohtdong.
Shuh shuh u Bah Dohtdong u la ong ruh ba ka seng kan pyrshah beit lada ka sorkar ka thmu ban pynlong ïa ka jingpynsngewthuh paidbah na ka bynta katei ka jingthmu bad u la ong ba ka sngewsih ruh ka long ba ka sorkar ka thmu ban leh kum ha Thangksai ha kaba ki la don lypa ka jingpynbeit ba marsyn don ka jingpynsngewthuh paidbah halor kane ka bynta, kino kino kiba pyrshah ha katei ka sngi yn bret sharud bad yn tan tang ïa kiba kyrshan.
“Ka jingpynlong ïa ka jingpynsngewthuh paidbah ka long ba kine ki 38 ïing ki la long kiba rit paid lypa, te ka sorkar kan shim ïa kiba bun paid bad hangta kan sa ong beit ba ka la jop hynrei ngi im ha ka synshar paidbah, ki paidbah ki don ïa ka hok ban pyrshah namar ba kane ka dei ka jaka jong ki bad kam dei ka jaka jong ka sorkar”, la ong u Bah Dohtdong.
