Nongpoh, Risaw 04
Katba ka jingïakren pynbeit pud hapdeng ka Sorkar Meghalaya bad ka Sorkar Assam ka don ïaid shakhmat na ka bynta ban pynbeit noh ïa u pud u sam bad weng noh ïa ki jingeh jong ki nongshong shnong ha ki shnong khappud na ka liang ka Assam ka dang bteng ka jingkyntur pud ha ki shnong khappud haduh mynta.
Ha ka Sngi Balang na ka liang u Syiem jong ka Hima Nongspung lem bad ar tylli ki seng ba kynthup ïa ka Khasi Students’ Union (KSU) bad ka Confederation of Ri Bhoi People (CORP) ki la pynpaw ïa ka jinglyngngoh bad sngewkhia jur halor ka jingnud jong ka sorkar Assam ban wan kyntur pud da kaba shna ïa ka surok wat ha ka jaka kaba dang hap pura hapoh ka Hima Nongspung jong ka jylla Meghalaya.
Kane ka jingwan kyntur pud jong ka Assam ka la paw pyrthei hadien ba u Syiem ka Hima Nong-spung, u Pa’iem Patrick Syiemïong lem bad kitei ar tylli ki seng ki la pynlong ïa ka jingleit jurip sha ka shnong Bakhlapara kaba ka tnat Public Works Department jong ka sorkar Assam ka la pyntrei beaiñ ïa ka surok kaba jngai kumba 1.203 kilometer ba la bei tyngka da ka sorkar Assam lyngba ka skhim Mukhya Mantrir Pakipath Nirman Achani ha ka jinglut kaba la kot sha ka 71.59 lak tyngka. Ïa kane ka surok la sdang ban pyntrei naduh ka 20 tarik u Jymmang mynta u snem.
Haba kren hadien ka jingjurip, u Pa’iem Patrick Syiemïong, u la ïathuh ba tang mar ïa ïoh jingtip halor kane ka kam, u la phah ïa ki briew na ka shnong Warmawsaw bad Umsohbar ba kin leit khmih bad lap shisha ïa ka jingtih surok. Kumta na ka liang ka jong u, u la pyntip ïa kane ka khubor sha u ophisar ba dei khmih jong ka thanat Rani Jirang na ka bynta ban pynsangeh noh mardor ïa kane ka jingpyntrei ïa ka surok.
U la ïathuh ba na ka liang u ophisar ka thanat Rani Jirang, u la ai jingtip ïa kane kam sha u Superintendent of Police ka Ri Bhoi bad namar ba um sngewhun, kumta u la phah da ka jingthoh ruh wat sha u Chief Executive Member jong ka KHADC na ka bynta ba un phah ïa ki ophisar ban ïarap pynsangeh mardor ïa katei ka jingpyntrei beaiñ ïa ka surok, naba katei ka jaka ka dei kaba dang hap pura hapoh ka jingkhmih jong ka Hima Nongspung jong ka jylla Meghalaya.
U Pa’iem u la ïathuh ruh, kumba long haduh mynta, um pat ïoh jingtip satia la na ka liang ka KHADC ka la phah briew ne em ban pynsangeh ïa katei ka jingpyntrei beaiñ ïa ka surok. Kumta da ka jingsngewkhia, um banse ban lum ban lang bad ki rangbah na ka shnong Umsohbar bad Warmawsaw lem bad ki seng ban wan jurip dalade ha kane ka sngi khnang ba kin ïohi da la ki jong ki khmat ïa ka jingpyntrei ïa katei ka surok.
Ha katei ka jingjurip, la ïohi ba ki don ki jingpyntrei ban thung dieng ba la bei tyngka lyngba ka skhim MGNREGA na Jirang C&RD Block bad ruh ïa ki pipe jong ka Water Resources ka jylla. U Pa’iem u la ïathuh ruh ba u kontraktor ba pyntrei beaiñ ïa katei ka surok u la pom lut khait ïa ki dieng bad pynïeng ruh ïa ka jingthoh (signboard) jong katei ka skhim kaba la bei tyngka da ka Sorkar Assam wat hapdeng ka jaka kaba dang dei pura hapoh ka jylla Meghalaya.
Halor kane ka kam, u Pa’iem u la kren shai ba lada long kumno-kumno ruh hap ban pynsangeh mardor ïa ka jingpyntrei beaiñ ïa katei ka surok bad ba shen kin sa leit ruh ban ai ujor pyrshah ïa u kontraktor ba pyntrei ïa ka kam sha u Deputy Commissioner ka Ri Bhoi khnang ba un ïoh leh ïa kaba donkam.
Ha kawei ka bynta, u Pa’iem u la pynpaw ïa ka jingbynñiaw ba ki briew kiba shong ba sah ha kitei ki shnong khappud ki shah ieh beiñ bad shah leh meinah ha ka Sorkar Meghalaya, kaba pynlong ïa ki teng teng na ka jingbym banse ha ka jingdik bad ka jingeh ba kin hap shim ïa ki skhim ba la ai da ka sorkar Assam.
“Teng teng ka pynkulmar jingmut wat ïa ngi ki Syiem ruh ban peit namar, bunsien haba ki briew ki donkam ïa ki skhim pynroi, na ka liang ka sorkar Meghalaya patde bunsien da leit pan ruh, ka shitom ban ai, katba na ka liang ka sorkar Assam ka ju wan ban tyrwa hi manla ka por, bad na ka liang ka jong nga ngam ju ailad ïa ki briew ba kin leit pan skhim na ka sorkar Assam bad ba ki dei ban pan beit na ka jylla Meghalaya bad ba donkam ban don ïa ka jingtrei lang ryngkat ryngkat ban pynïoh ïa ki jingdonkam jong ki paidbah kiba shong ba sah ha ki thaiñ khappud,” la ong u Pa’iem.
“Ha kajuh ka por nga kyrpad ïa ka sorkar ba ïa ka jingdonkam jong ki skhim ha kine ki thaiñ khappud ba kan sngewbha ban kham ïarap khyndiat ban ai kino kino ki jingdonkam bad ka jingthmu jong kane ka long ba khnang ba ki jaka puta kiba hap hapoh ka Hima Nongspung kin neh kin sah. Hynrei ka kulmar jingmut wat ha ngi ki Syiem ruh ban peit namar bunsiem ki briew ki donkam ïa ka skhim pynroi, hynrei ka sorkar Meghalaya pat de bunsien da ngi leit pan ruh ka shitom ban ai katba ka Assam ka ju wan ban tyrwa hi man la ka por,” la ong u Pa’iem.
U nongïalam ka CORP Bah Bandari Ryntathiang u la ong ba kine kiei kiei baroh ki wan jia dei namar ka jingtlot jong ka sorkar jylla da kaba bynrap ba ki paidbah kiba shong ha kitei ki thaiñ ki kwah surok, te haba ka Sorkar Assam ka wan ban tyrwa, ki paidbah kim banse ban pdiang namar ka sorkar Meghalaya haduh mynta ka khlem ai eiei ban pynbiang ïa ki skhim pynroi ha kitei ki thaiñ khappud.
Kiwei pat kiba la ai jingkren ki la ong ba kumba long mynta, ki paidbah ba shong ba sah ha kitei ki thaiñ khappud ki shem jingeh shikatdei na ka jingbym biang jong ka surok, ka umbam umdih bad kiwei kiwei ki skhim pynroi. Kane ka la pynlong ïa ki paidbah ba kim banse ban pdiang ïa ki skhim kiba la wan tyrwa da ka Sorkar Assam.
Nalor nangta ki la pynpaw ruh ba lada ka sorkar Assam ka ai tang ki skhim pynroi, kata ka biang eh. Hynrei kumba ka long mynta, ka jingthmu jong ka sorkar Assam ka long ba ynda la pyntrei ïa ki skhim pynroi, kan kam trai syndon ïa ki jaka puta kiba dang dei ki jaka jong ka jylla Meghalaya bad ki bym don ruh ha ka jingïakajia pud.
Halor kane ka bynta, ka Raid Warmawsaw, ka CoRP, bad ka KSU ki pynpaw ba kin ai ka jingkyrshan pura ïa ka Hima Nongspung bad dawa ruh na ka sorkar ba lada ka kwah ba ki jaka puta jong ka jylla kin neh kin sah kumba ju long, ka hap ban shim khia ban pynïoh ïa ki skhim pynroi kumba lah ka Sorkar Assam.
