Shillong, Risaw 04
U Principal ka St. Paul’s Higher Secondary School, Marbisu, Fr. Jameris Shylla, u la ong ba ka samla Phibankyn-tiew Sunn bad u samla Wanboklang Kurbah ki long ki samla kiba tista ban wan sha skul bad kiba ju kyrshan bad ïarap bha ïa ka skul ha ki liang bapher-bapher.
U la pynpaw ruh ba kum ka skul kam shym la poi pyrkhat halor kaei kaba la jia ïa kitei ki 2 ngut namarba ym lah ban tip satia ïa ki jingeh ba ki shem sha lyndet.
Ha kajuh ka por, u la kyntu ïa ki samla ban long kiba ïar ha ka jingmut-jingpyrkhat bad ba kin shaniah ha U Blei namar ka jingim khlem I Blei, ka long leh nohei.
U la ong ruh ba dei ban pynpaw ïa ki jingeh sha kito kiba ïajan tam bad kiba lah ban sngewthuh bad ban ym set ha lade namar kane ka ïalam sha ka jingmut-jingpyrkhat ka bym khuid bad kaba lah ruh ban mih ka jingsngewsih.
“Hooid, ngi dap da ka jingsngewsih bad khamtam eh ka jingkyndit ïa kiba kum kine ki jingjia. Kum ka skul, kum ki nongpeit, ngim da poi pyrkhat eh ba kan wan kaba kum kane ka jingjia,” la ong u Fr. Shylla.
U la ïathuh ruh ba kum ka skul, ka ju hikai, ju sneng ju kraw ïa ki khynnah ha ki rukom bapher-bapher, ym tang ha ka pule-puthi, hynrei kumno ban burom ïa ka akor longbriew-manbriew kumjuh ban ieid ïa ka lynti ïaid khamtam ban long kiba shakhmat.
Haba kylli, u la ong, “Kine ki 2 ngut ki khynnah – Wanboklang Kurbah bad Phibankyntiew Sunn kiba shong ha ka klas XI, ki dei ki khynnah kiba jai-jai, ki khynnah kiba kohnguh bad ki khynnah kiba wan skul tikna, kiba kyrshan bad kiba ïarap bha ïa ka jingdonkam jong ka skul.”
U Principal u la ïathuh ruh ba u samla Wanboklang dang shen u la ïashim bynta ha ka prokram jong ka KHADC ba la pynlong ha Shillong katba ka Phibankyntiew ka la ïashim bynta ha ka prokram sngi burom nonghikai.
“Kum ki samla lehse ngi ïohi ïa kaei-kaei baroh, ngim dei ban pyrkhat da kumwei pat ïa ka jingim, hooid, ka jinglong ha skul, ha ïing – ki don la ki jong ki jong ki jingeh, ngi wan na ki longïing bapher-bapher bad haba ngi wan sha skul ngi long shipara,” u la ong.
Na ka liang jong u, u la ban jur halor ka jingdonkam ban ïar ka jingmut-jingpyrkhat, ban long kiba kohnguh bad kiba shaniah ha u Blei namar ka jingim ba khlem u Blei ka long leh nohei.
“Ngim dei ban set ïa kaei-kaei baroh kaba don ha lade bad haba ngi shem jingeh, haba ngi sngewtieng ban kren ïano-ïano, lehse ngi wad ïa ki paralok kiba ïajan tam bad kiba lah ban sngewthuh ïa ngi ne ha ki kmie ki kpa. Haba ngi set, ki kun shibun kiei-kiei baroh bad ki mih ki jingmut jingpyrkhat ki bym khuid bad kiba pynlong ban shim ïa ki sienjam ki ban ktah pat ïa ka jingim hadien-habud,” la ong u Fr. Shylla.
Haba pynsngew ba ki khun kim dei ban sheptieng ïa la ki kmie ki kpa, pynban ki dei ban sngewkmen ba ki don ïa ki, u la ong ba ki khun ki kti ki dei ban ïathuh ïa ki jingeh ha ki kmie ki kpa namar dei ma ki kiba pun ba kha bad kiba ïarap ha ki liang baroh.
Shuh shuh u la bynrap, “Ki kmie ki kpa ha kajuh ka por kin hap ban sngewthuh bha ïa la ki khun ki kti. Hooid, ngi donkam ban sneng ban kraw, hynrei ngi dei ban shah shkor, ban don por ïa ki namar ha ka juk ba mynta lada ngim husiar bad lada ym don por la ki khun ki kti, ki wad da kiwei pat ki lad kiba ktah pat ïa ka jingim jong ki.”
