Shillong, Risaw 05
Hadien ba ka Federation of Khasi Jaiñtia and Garo People (FKJGP) ka la lap ha ka kaiphod ba la peit bniah ïa ka umbam umdih da ka State Food Testing Laboratory Commissionerate of Food Safety kaba don ha Pasteur Hills Shillong ba ka umbam umdih na ki 44 tylli ki shnong kam long kaba shngaiñ ban dih, na ka liang u Myntri Rangbah ka jylla u Conrad K Sangma, u la pynpaw ba ka sorkar kam dei ban kheiñ sting ïa katei ka kaiphod kaba la phah test da ka FKJGP.
Ka FKJGP ka la phah peit bniah ïa ka umbam umdih ba la shim nongmuna na ki 46 tylli ki top um kiba don ha ki shnong bapher bapher hapoh sor Shillong ha ka 22 tarik u bnai Nailar 2023. Ha katei ka kaiphod la lap ba ka umbam umdih napdeng ki 46 tylli ki top um la shem ba ka umbam umdih kaba long kaba bit ban pyndonkam ka long tang na ki ar tylli ki top um katba 44 tylli kiwei pat ki long ki bym shngaiñ satia ban pyndonkam.
Haba kren sha ki lad pathai khubor, u Myntri Rangbah u la pynpaw ka jingai khublei ïa ka seng FKJGP kaba la leh ïa katei ka kam kaba long ka sienjam kaba bha na ka bynta ka bha ka miat jong u paidbah.
U la ong ba ha nongbah Shillong ki don da ki phew hajar tylli tam ki top um kiba pynïaid da ki shnong ki thaw, ka Municipal, ka PHE bad da ki nongsam um bapher bapher.
Nalor kane u la ong ba ka tnad PHE ka ju pynlong ïa ka jingpeit bniah ïa ka um man la ka por bad ka kaiphod kaba ki ïoh ka long kaba bit ba biang. U la ong ïa kane ka jingphah peit bniah la leh na ka por sha ka por bad yn leh ruh ha ki por ki ban sa wan kumjuh.
U la ong ba ka umbam umdih ka wan na ki tyllong um bad la sam sha ki bynta bapher bapher jong ka Municipal, ka PHE bad ki kiwei kiwei sha ki top um bapher bapher kiba la pyniaid da ki shnong ki thaw ne ka Municipal ne ka PHE. Haba ka um ka tuid lyngba ki pipe um ha kaba ki don ki pipe um kiba la rim bad hangta ka lah ban pynlong ïa ka um ba kan jaboh bad halor kata ka bynta ka long kaba donkam ïa ngi ba ngin khmih ba peit bniah bha.
U Myntri Rangbah u la pynpaw ba ha nongbah Shillong ki don da ki hajar tylli ki top um. Kumta u la pynpaw ba u la dep ban bthah ïa ka tnad PHE ban leh biang ïa ka jingpeit bniah na ka bynta ka jingshngaiñ ki paidbah.
“Ngi shim khia ïa ka kaiphod bad ngi la ong ïa ka tnad ba kan pynlong ïa ka jingtohkit halor kane ka bynta baroh khamtam ha kaba ïadei bad ki 46 tylli ki top um kiba ki la kdew bad lap ba ki long ki bym shngaiñ ban dih bad ban pyntikna ba ngin shim lut baroh ki lad ki lynti halor kane ka bynta bad ngin tohkit ha baroh ki liang”, la ong u Myntri Rangbah.
