Shillong, Risaw 05
Ka Meghalaya High Court ha ka Sngi Palei ka la ong ba ka long ka jinglehraiñ ba la donkam ïa ka ïingbishar ban pynkynmaw ïa ki shnat treikam jong ka Sorkar Pdeng kum ka National Highways Authority of India (NHAI) ïa ki kamram bad ki jingkitkhlieh jong ka.
Ïa kane, ka High Court ka la pynpaw haba shong bishar halor ka jingmaramot ïa ka surok National Highway-6 kaba la sniew shaba palat.
Ha ka 3 tarik Risaw, 2023, ka NHAI ka la ai ïa ka kaiphod ha kaba la kdew ba ka la thung da u kontraktor bathymmai ha ka 29 tarik Nailur, 2023 ban maramot ïa ka surok naduh na Sonapur sha Ratacherra. Ha kajuh ka por, la batai ba u kontraktor uba la don lypa un maramot ïa ka surok na Jowai sha Sonapur.
Ka jingmaramot ka long ka jingpyndap ïa ki thliew ki syar, jingpynkhuid ïa ki nala ha Khliehriat, lynti ïaid kjat, bad khamtam eh ban maramot ïa ka jaka ba don ka Tunnel ha Sonapur.
“Ngi kyrmen ba ka jingmaramot kan long kumba la kdew ha kane ka kaiphod khnang ba yn lah ban pynduna ïa ki jingeh ba ki briew bad ki kali ki mad haba ki ïaid na kane ka surok,” la ong ka High Court.
Ha ka kaiphod, la suh lang ki dur ban pyni ïa ka jingïaid jong ka kam maramot. Hynrei na ka liang u nongmudui u la ai da ki dur ban pyni ïa ka jinglong jingman ka surokbah NH-6 hajan ka shnong Mynkre, Tongseng, Sonapyrdi bad Lumshnong. Ïa kine ki dur la shon ha ka 4 tarik Risaw, 2023, bad na ki dur la sngewthuh ïa ka jingsniew ba palat liam jong ka surokbah kaba la dap satang ki thliew ki syar bad ka jingjah syndon jong ka surok rong.
“Ym lah satia ban pdiang ïa kaba kum kane ha ka Ri kaba la shai bad ka long ruh ka jinglehraiñ ba ka ïingbishar ka hap ban pynkynmaw ïa ki shnat treikam jong ka Sorkar Pdeng kum ka NHAI ïa ki kamram bad ki jingkitkhlieh jong ka. Ka jinglong jingman ka jaka ha kane ka jylla ka long kaba jynjar bad ki shnong kiba don shajngai ki hap ban ap syllang ban ïoh ïa ki jingdonkam. Da ka jingsniew palat jong ka surok NH-6, khamtam ka surok na Jowai-Ratacherra, ka jingpynpoi ïa ki mar bakongsan ka la nang shah ktah jur,” la ong ka High Court.
Ka la kyrmen ba yn lah ban pyndep ïa ka jingmaramot ïa ka surok na Jowai sha Ratacherra hapoh jong u bnai ban wan. Hadien kata, ka High Court ka la ong ba dei ban shim ïa ki sienjam ban nang pynbha shuh-shuh ïa kane ka surok.
“Kano-kano ka surok ne surokbah ha ka Ri, kan ym lah ban long kumba long ka surokbah NH-6 na Jowai sha Ratacherra,” la ong ka High Court.
Ka la kynthoh ruh ba ki bor jong ka sorkar jylla ki la dei ban pyntip kham mynshwa sha ki bor bahalor jong ka NHAI ha Shillong bad ba kin shim ïa ki sienjam ban pynthikna ba ka surok kan ym sniew shaba palat.
Nalor ka NHAI, ka High Court ka la bthah ïa u Deputy Commissioner ka East Jaiñtia Hills ba un ai ïa ka kaiphod halor ka jinglong jingman jong ka surok NH-6 hapoh saw taïew.
La bthah ruh ïa ka sorkar jylla ba kan pyndep ïa ka jingmaramot ïa ka surok Jowai Bypass hapoh saw taïew.
