Shillong, Risaw 06
U MLA ka VPP na North-Shillong, Bah Adelbert Nongrum u la pynpaw ka jingsngewkhia halor ka jinglong-jingman ka umbam-umdih kaba la pyndonkam da ki 44 tylli ki shnong jong ka nongbah Shillong naba ka long ka bym shngaiñ bad kaba buh jingma shi kat dei ïa ka koit ka khiah jong ki paidbah.
“Nga pynpaw ka jingsngewnguh ïa ka FKJGP kaba la leh la ka kamram. Ha ka jingshisha ka dei ka tnad treikam ka Sorkar ka ban hap leh la ka kamram – ban shim ïa ki nongmuna halor ka jingjakhlia jong ka um bad ban phah peit bniah,” la ong u Bah Nongrum.
Ha kajuh ka por, u la ong ba ka Food Safety and Standards Authority of India (FSSAI) ka la pynskhem ha ka kaiphod ba ka um-bam um-dih kam long kaba shngaiñ bad ka lah ruh ban thaw shibun ki jait jingpang.
“Mano ban shim ka jingkitkhlieh?” buh jingkylli u MLA.
Haba kdew ba kane kam dei shuh ka sien ka banyngkong, u la ong ba kane ka jingjia ka pynpaw ba ki bor ba dei khmih kim don satia ka jingkitkhlieh bad kumta dei ban pynrem da baroh namar kane kan ktah ïa ka koit ka khiah bad ka jingim ba kordor jong ki mynsiem briew namar ka um ka dei ka jingim.
Kumjuh haba pynsngew ba ka um ka dei kaba donkam man ka khyllipmat, u la ong, “Namarkata ngin ym lah ban ïapeiñ bad ka jingpaka – ka tnad ka hap ban pdiang ba ka don ka jingduna. Lehse kumba nga ïoh jingtip na ka tyllong khubor ka tnad treikam, haduh mynta kam pat don u ‘Water Analyst’, u ‘Chief Chemist’ kiba dei ban peit ïa ka jinglong-jingman ka um – ban long kaba bit na ka bynta ki paidbah ban pyndonkam.”
Shuh shuh u Bah Nongrum u la bynrap ba ka Sorkar ka hap ban shimkhia khlem da pynslem ne buhteng ban peit haei ki don ki jingduna khnang ba ki paidbah kin ym long ki diengshaiñdoh, kumjuh ban khmih ïa ki ‘pipe’-um, top um, jaka pynlang um bad ki ‘pipe’ ba pynpoi um.
“Ka tnad ka dei ban shim ka jingkitkhlieh ban pynkhuid tikna bad lada ki bor ba dei khmih kim pyndep hok la ka kamram, kin ym lah ban thet-kti, namar ka deiti ka long ba lada kim lah ban pynsuk ïa ka jingeh, kaba mut ki dei ban shim halade ka jingkitkhlieh,” la ong utei u nongmihkhmat.
