Shillong, Risaw 06
Ki ar ngut ki tyngshop biria jong ka phlim Johkhe.com, u Bah Marloon Laloo uba tip kum Maheh bad Dao Toi ki la ong ba ki kmie ki kpa kim dei ban burom ïa u saïantis ne ñiewbeiñ ïa u nongñiah taksi ha ka kam shongkha shongman.
Ïa kine ki kyntien ki la pynpaw haba ai jingkren hadien ba la kut ka jingpyni ïa katei ka phlim ha ka por 2:30 baje nohphai sngi ha Bijou Cinema, Shillong kaba la sdang mynta ka sngi Thohdieng ka 6 tarik Risaw, 2023.
U Bah Dao Toi u la ong ba ka jingsneng ha kane ka phlim ka long ba u kpa u dei uba khyllew hynrei u mon pyrsa ïa u saïantis bad u ibeiñ ïa u nongñiah taksi.
U la ong ba shisien ba la khyllew ka jingim jong ka khun kan nym poi sha ka jingsuk.
Namar ba ki paidbah ki la wan ai jingkyrshan ïa kane ka phlim ha Bijou Cinema, kum ka dak jong ka jingkmen ki tyngshop bad puron ki la ïoh ban shad ïa ka jingrwai ‘Love Story’ ba dang shu pyllait ha kine khyndiat sngi ha Youtube.
Na ka liang u Director jong kane ka phlim u Kiki Garod u la ong ba ka kyntien “Ym don shuh” ka pynkulmar ïa kiba sngap namar ki dang mut ba u briew u la khlad lada ki briew kiba ïathuh kim nang ban batai.
U Kiki Garod u la ong ïa kitei kyntien “Ym don shuh” ha kane ka phlim ka dei ba la pyndonkam da ki khun ban pyntip sha ka kmie haba um don shuh ha jaka ba u thiah ha surok ha ka phlim ‘Johkhe.com’ kaba la ak da ki tyngshop biria na Jowai.
U Kiki u la ong ba da ka jingbatai bakla ïa ka kyntien ‘ym don shuh’ ki bahaïing ha jingkyrkieh ki la rah bakla ïa ka metïap haduh ba ka la pynkulmar ïa ka ïing ka sem .
Ha kane ka sngi sdang, ka puron barim ki phlim Pnar ka Kong Embhahlangki Challam kaba shong ba sah ha Jowai ka la wan poi sha Bijou Cinema, Shillong ban ai jingkyrshan ïa kane ka phlim.
Wat la u slap u la pynthut ha ka por mynstep hynrei ki paidbah kiba ieid phlim Khasi ki la mih na la ki jong ki ïing ki sem ban wan peit ïa kane ka phlim biria kaba la ïashim bynta da ki khlur ak phlim na Jowai naduh u Conel Phira ba tip kum u Slek, Marloon Laloo ba tip kum u Maheh, Dao Toi lem bad ar ngut ki puron, ka Rimika Dkhar bad ka Rishwa Suchiang kaba la Direct da u Kiki Garod. Haba phai biang sha ka Kong Embhahlangki Challam, kane ka puron ka la ak saw tylli ki phlim Pnar; kaba nyngkong ka dei ka ‘Deipharchi ïa nga’ ha u snem 2006. Kane ka puron ka la sangeh ak phlim naduh ba ka ïoh khun. Kumta ka la kyrpad ïa ki paidbah ban kyrshan ïa ka phlim ‘Johkhe.com’ kaba dang ïaid mynta ha Bijou Cinema namar ïa kane ka phlim la kren ha ktien Khasi kaba ïa sngewthuh lut da baroh.
