Shillong, Risaw 06
Ka Executive Committee jong ka Khasi Hills Autonomous District Council (KHADC) ha ka sngi Thohdieng ka la lumlang ïa ki nongsynshar shnong na sor bad khapsor ban pynsngewthuh shaphang ka jingpyntreikam ïa ki aiñ kiba la ïoh jingmynjur kiba kynthup ïa ka aiñ haba ïadei bad ki jaka-puta, ka aiñ shna ïing bad ka khuid ka suba ha ki shnong ki thaw.
Ïa kane ka jingïalang la lum da u Executive Member (EM), Bah Teiborlang Pathaw uba peit ïa ka tnat Land bad Building Byelaw ka KHADC ha ka jingïadonlang u Dy CEM, Bah Pynshngaiñlang N Syiem lem bad ki ophisar ha Hotel Pinewood.
Ki aiñ kiba la pynsngew sha ki nongsynshar shnong ki kynthup ïa ka Khasi Hills Autonomous District (Regulation and Administration of Land) Act 2021, Khasi Hills Autonomous District (Solid Waste Management) Act, 2020 kiba la ïoh jingmynjur na u Lat nalor ka aiñ shna ïing (building byelaw) ba pyntreikam da ka District Council ha ki jaka kiba hap shabar na u pud ba pyntreikam ka Meghalaya Urban Development Authority (MUDA).
Haba kren sha ki lad pathai khubor, u Bah Pathaw u la ong ba da ka jingdon ka aiñ kaba pyntreikam da ka KHADC ki nongshong shnong ki ïoh ka lad ban pynrung kyrteng ïa ki jaka puta bad ka Council katkum ka aiñ bad ki kyndon kiba la buh.
U la ong ba ruh ha kane ka jingïalang la pynsngewthuh lang ïa ki nongsynshar shnong haba ïadei bad ka Digital India Land Record Modernisation Programme (DILRMP) kaba wan na ka Sorkar Pdeng bad hap ban pyntreikam da ka District Council namar ka Sorkar Jylla ruh ka la bynshet ha ki District Council ban peit ïa ki jaka puta bad buh ryntih.
U la ong ba lyngba kane, ki trai jaka ruh kin suk bad kin biang ka jingbuh ryntih ïa ki jaka puta jong ki bad lait na ka kynrum kynram ha kaba ki jaka kiba la pynrung bad ka Council ki ïoh jingithuh katkum ka aiñ.
U Bah Pathaw u la ai nuksa ba ki don ki khep ha kaba ïa ka jaka la die ar sien ne lai sien da kaba thok namar ka jingbym buh ryntih ïa ki jingdon jingem khamtam ka jaka, bad lyngba kane kan long ka jingmyntoi bad ïada ïa ka hok jong kiba dei hok ki trai jaka bad lait ka jingïakajia ne kynrum kynram.
U Bah Pathaw u la ong dang shen, wat ka Meghalaya High Court dang shen ka la pynpaw ka jingsngewkhia haba ïadei bad ka kynrum kynram ki jaka puta bad ka don ka jingpynsngew ba dei ban pyntreikam da ka property card, hynrei ban ïa ka property card ka dang kham biang ka Digital Land Record.
U Bah PN Syiem ruh u la ong ba ka Sorkar Jylla ruh ka la pynskhem ba ka jingbuh ryntih ïa ki jaka puta ka dei bad ka Council.
Ha kane ka sngi la pynshai shuh shuh haba ïadei bad ki la aiñ shna ïing kiba la pyntreikam da ka KHADC bad ka dor ruh ka dang kham jem.
U Bah PN Syiem u la ong ba ha kine ki khyndiat snem la ïeng pyrshah ban pyntreikam da ka MUDA ïa ka aiñ shna ïing ha Jylla namarba ïa kane ka aiñ lah ban pyntreikam da ka District Council.
U Bah PN Syiem u la ai khublei ruh ïa ka Sorkar MDA kaba la nang pynskhem shuh shuh bad aibor ha ka District Council ban pyntreikam shabar na u pud ba pyntreikam ka MUDA.
Halor ka khuid ka suba, ka KHADC ka la pynlong aiñ ïa ka Khasi Hills Autonomous District (solid waste Management ) Act 2020 bad lyngba kane la bthah ïa ki shnong ban thaw ïa ka Solid Waste Management Committee bad pyntreikam lang ruh ïa ki buit katkum.ka juk mynta kum ban tyllait bad pynkhuid ïa ki jaboh jabaiñ.
U Bah Pathaw u la pyntip ba ki don ruh ki buit bad rukom lum ïa ki jaboh jabaiñ bad rukom pynkhuid da kaba bud nuksa ïa kaba leh ha Goa kumno ban lum ïa ki jaboh jabaiñ bad ki buit ban pynkylla sha ka sboh.
Ha kane ka sngi da ki spah ngut ki nongkitkam shnong ki la wan ban ïashimbynta ha kane ka jingïalang.
