Shillong, Risaw 08
Ka puron ki phlim Khasi kiba ki paidbah ki kham sngewtynnad bha ka Kong Wanri Pyngrope ka la kyrpad ïa ka sorkar jylla ba kan ïarap shna cinema hall bad ka film city ha nongbah Shillong lada ka kwah ban kyntiew ïa ki phlim Khasi.
Haba ïakren bad ka Kong Wanri hadien ba ka la wan peit ïa ka phlim Johkhe.com ha Bijou Cinema, Shillong ka la ong ba lada ka sorkar ka la ïarap ban shna hall bad film cinema kan sa long shisha ka lad ai kam ïa ki samla namar ki nongpynmih phlim kin sa lah ban siew dor kham heh ïa ki puron bad ki tyngshop bad ïa baroh ki nongshim bynta.
Ka la ong ba ki samla Khasi ki don shibun shisha ka sap rwai, ka shad bad ban ak hynrei kin sa plie shibun ïa ka sap lada ka sorkar ka la phaikhmat sha ki kam shna phlim.
Kumta ka la kyntu ruh ïa ki nongpynmih phlim ba kin shna ïa ki phlim kiba itynnad khnang ba ki paidbah kin ai jingkyrshan namar ki la pynlut ka bai kali haba ki wan na shnong.
Nalor kane, ka la ong ban don la ka jong ka hall lada ka sorkar ka ïarap ban shna namar haduh mynta ki nongpynmih phlim ki hap ap lada ym don ki phlim hindi. Kane ka mut ki phlim Khasi ki la ïoh lad ban pyni ha Bijou Cinema hynrei lada don ki phlim hindi kiba kham paw ki hap ap da ki bnai ban ïoh pyni.
Shuh shuh ka la ong ba lada ka sorkar kan shna ïa ka film city ki nongpynmih phlim ki lah ban ringdur ha kane ka jaka lada donkam ki jaka bishar, ki jaka set ïa ki koidi, ki kolej, ki ïew ki hat, ki surok, ki rel ki liengsuiñ.
Khatduh ka la kyntu ïa ki samla kynthei bad shynrang lada ki kwah ban ïoh long kum ka puron ne u tyngshop ki dei ban trei shitom da kaba nang ban ak lada dei por ïam, ne dei ban dom ne ban rkhie, namar ka kam ak phlim kam dei kaba suk ban shu ïoh ban ak khlem da pynshitom ïalade.
Ka Kong Wanri ka la ïathuh ba mynta ka la pynkhreh ban ak sa ïa ka phlim ‘Snar’ ka ban pynmih da u Bah Commander Shangpliang bad ka Borsing ba la ring hi da u Kiki Garod. Haba kylli balei kam shym la ak ha ka phlim Johkhe.com ka phlim ba la ringdur da u lok u Kiki Garod, ka la ïathuh ba kiba pynmih ïa kane ka phlim ki kwah ban ak tang na ki thaiñ Jaiñtia. Dei na kata ka daw kam shym la ïoh lad, hynrei ha kiwei ki phlim kan sa ïoh lad ban ak.
