Gaza City, Risaw 09
Ka kynhun na Palestine, ka Hamas, ha ka Lah Sngi U Blei ka la byr-ngem ban pynïap noh ïa ki briew kiba ka la rahbor lada ki shipai Israel ki dang bteng ban pynbthei da ki bom khlem da ai jingmaham lypa ha ki jaka ba sah ki paidbah ha Gaza Strip.
“Kano-kano ka jing-thombor ïa ki paidbah jong ngi khlem da ai jingmaham lypa shwa kan ïalam sha ka jingshah pynïap jong uwei u ‘riew paidbah uba ngi la rahbor na Israel,” la ong ka Ezzedine al-Qassem Brigades, kaba dei ka kynhun kieng atiar jong ka Hamas, ha u kyrwoh khubor, la ong ki lad pathai khubor bapher-bapher.
“U nongshun um sngewthuh ïa ka ktien jong ka jingdon ka mynsiem briew, bad namarkata, ngin jubab ha ka ktien kaba ki sngewthuh.”
Naduh ka Sngi Saitjaiñ, ka Israel ka la ther ïa ka Gaza Strip hadien ba ki lehnoh Hamas ki la rung sha Israel bad ki la pynïap ïa bun ngut ki nongshong shnong ka Israel. Nalorkata, ki Hamas ki la ther ruh da ki ‘nam ding bad ki la rahbor ïa kumba 100 ngut ki nongshong shnong ka Israel.
Uwei na ki nongaiktien ki shipai Israel u la ïathuh ba la aiti sha ki bahaïing hasem ïa kumba 30 ngut ki briew kiba la shah rahbor.
Katkum ka lad pathai khubor BBC, la ong ba naduh ka Sngi Saitjaiñ, ka jingdon jong ki briew kiba la khlad ha Israel na ka jingthombor ka Hamas ka la kot sha kumba 900 ngut kynthup ïa ki 260 ngut kiba la shah pynïap ha ka jaka ba la pynlong ïa ka tamasa rwai.
Ha Gaza, ki la don kumba 600 ngut kiba la khlad hadien ba ka Israel ka la sdang ban ther ïa kiba bun tylli ki jaka.
