Shillong, Risaw 09
Ki heh ka World Bank ki la wan khnang ban ïatai bad ka Khasi Hills Autonomous District Council (KHADC) na ka bynta ban kyrshan ruh ïa ka Council kumno ban pynkhuid ïa ki jaboh jabaiñ kiba la satah ha kylleng namar ka jingbret pathar ki nongshong shnong.
Kiba mihkhmat ïa ka World Bank ki long u Thierry Martin, u Keith Newman, u Riddhiman Saha nalor u Bah W. Kharkrang uba mihkhmat ïa ka Meghalaya State Pollution Control Board. Ha kane ka jingïakynduh ki la ïatai sani halor ka bynta ba ka World Bank ka lah ban ïarap ïa ka Council ha ka rukom lum bad pynkhuid ïa ki jaboh jabaiñ ha ki shnong ki thaw.
Na ka Executive Committee jong ka KHADC la lamkhmat da u Chief Executive Member (CEM), Bah Pynïaid Sing Syiem ha ryngkat u Dy CEM, Bah PN Syiem, ki Executive Member (EM) kiba kynthup ïa u Bah Teiborlang Pathaw, u Bah Victor Ranee ryngkat ki ophisar ka KHADC.
Haba kren sha ki lad pathai khubor hadien ka jingïakynduh, u Bah Pynïaid u la ïathuh ba kum ka EC ka la peit ïa ki mat kiba donkam kiba dei ban leh khamtam haba ïadei bad ki san tylli ki district kiba hap hapoh ka KHADC.
U la ong ba ki paidbah ki la lynga haba ïadei bad ka jingsatah ki jaboh jabaiñ kiba mih na ki ïing ki sem bad na kiwei ki jaka kiba ktah ïa ka imlang ka sahlang bad ïa ka mariang hi baroh kawei.
U la ong ba kumba la bynshet bad aibor katkum ka aiñ, ka EC kam kwah ba ki shnong kin khuid tang haba wan ki kali kiba kit ïa ki jaboh jabaiñ bad leit bret sha jaka pyllang ñiut, bad ki jaka pyllang ruh ki pynmih jingsma bad ktah ïa ki shnong kiba don hajan.
Kumta u la ong ba ha kane ka jingïakynduh, la ïakren sani halor kumno ka EC kan peit naduh ki shnong ki thaw, ki hima bad raid ha kaba la shim ïa ka rai ban pynlong ïa ka jingpynshai paidbah da kaba ïatrei lang bad ki shnong ki thaw, ki hima, ki raid khnang ba kane ka jingpynshai kan long kaba jop bad ki don ruh ka jingthmu ban hikai ïa ki paidbah ban teh lakam ïa ka jingbret pathar ïa ki ñiut, da kaba pyntreikam ïa ki kyndon ban daiñ kuna ïa kiba bret pathar ha surok bad lynti syngkien. Ka jingpynshai kan dei ruh ha ki skul, ki kolej bad ki ïew ki hat.
La rai ruh ban wad biang sa katto katne ki jaka ban buh ïa ka Recourse Recovery Centre namar haduh mynta ka dang don tang ha Mawlai Mawroh.
U la batai ruh ba ha kane ka RRC bad ka EC ka dang wat biang sa kato katne ki jaka ban buh ïa kane ka RRC.
Ha kane ka RRC, yn wanrah ïa ki jaboh jabaiñ bad yn pynïakhlad ïa kiba pyut bad bym pyut na ka bynta ban pynkylla ruh sha ka sboh.
Kumta la tyrwa sha ka World Bank ban ïarap mang pisa kyrpang na ka bynta kine ki jingthmu kiba ka KHADC ka thmu ban pyntreikam bad kumba long mynta ka Council kan pynbiang ïa ka jingpynkhreh bad ruh ïa ka mang pisa katno yn donkam.
Haba kylli ba ka Sorkar Jylla ruh ka pyntreikam kumjuh haba ïadei bad ka khuid ka suba, u CEM u la ong ba ka Sorkar Jylla bunsien ka leh lyngba ka Municipal Board kum ha Shillong kata ha ki jaka kum ka Jail Raod, European ward, Khyndai Lad bad katto katne ki jaka kiba shu ïasoh bad ka municipal tang ha ka khuid ka suba (sanitation).
Kumta u la ong ba ka Council kan peit ïa ki jaka shabar na ka Municipal bad kan long ka jingtynjuh ïa ka Council hynrei da ka jingïatreilang ki shnong ki thaw bad ki nongshong shnong kan long ka jingjop.
U la ong ba na ka 15th Finance Commission ruh ka don ka bhah lyngba ka ‘tied grant’ ha kaba la mang thik na ka bynta ka khuid ka suba (sanitation) bad umbam umdih.
U CEM u la pyntip ba ki briew ka World Bank kin sa leit peit ruh ïa ka Wah Umkhen ha Them Basuk, nangta ha Umpling, Pynthorumkhrah, RRC ha Mawlai Mawroh bad sha jaka pyllang jaboh ha Marten ha Mawlai ha ka sngi Ba-ar.
“Ngin ïatreilang bad ki shnong ki thaw na bynta ban ïoh jaka ban buh ïa ka RRC bad kumno ban wanrah bad pynneh ïa ka jingkhuid ha ki shnong ki thaw, ki jaka long ïew bad kiwei kiwei,” la ong u Bah Pynïaid.
