Shillong, Risaw 10
Ka Hynñiewtrep National Youth Front (HNYF), East Khasi Hills District ha ka Sngi Ba-ar ka la leit ban ïakynduh ïa ki nongïalam jong ka jaka siat ‘teem’ kaba don ha Polo ba la tip kum ka Khasi Hills Archery Sports Institute ban ïakren ha kaba ïadei bad ka jingïoh lum khajna jong ka sorkar.
Haba kren sha ki lad pathai khubor hadien ba ka seng ka la dep ban ïakynduh ïa ki nongïalam jong ka Khasi Hills Archery Sports Institute, u President ka HNYF, Bah Bless Dkhar u la ong ba ka jingleit jong ka seng ha katei ka jaka kam dei ba kan pyrshah ne khang ïa ka jakpoh jongno- jongno hynrei ban leit ïakren ha kaba ïadei bad ka jingïoh khajna jong ka sorkar namar na ka por sha ka por ka sorkar ka ju ong ba kam ju don kata ka jingïoh khajna na ki dukan thoh ‘teem’.
U Bah Dkhar u la ong ba ha katei ka jingleit jong ka seng, ka la lap ba ka Hynñiewtrep ka don ïa ki kot ki sla bad ka laisen kaba biang.
Nalor kane u Bah Dkhar u la ïathuh ba wat la na ka liang ka sorkar ka khlem ailad ïa ka Hynñiewtrep ban pynthymmai ïa ka laisen kaba la pynlong ïa ki nongpynïaid jong ka Hynñiewtrep ba kin rah ïa kane ka mat shapoh ka ïingbishar. Hynrei na ka liang ka ïingbishar ka khlem pynmih satia ïa kano-kano ka hukum ban pynsangeh siat ‘teem’ lane ban nym shah ban pynmih nombar bad ki nongpynïaid jong ka Hynñiewtrep ki la ïathuh ba naduh ba la kut ka laisen ha u snem 2016, ki ju siew beit ïa ka khajna haduh mynta sha ka sorkar.
U Bah Dkhar u la ong ba ka seng ka la pynsngew ruh sha kitei ki nongpynïaid ba ha ki dukan thoh ‘teem’ kiba bun kiba pynïaid ki dei ki bar jylla ki bym biang ïa kino-kino ki kot ki sla kiba biang kaba long be-aiñ. Namar kata, kane ka la pynlong ïa ka seng ba kan nym lah ban shu sngap ba ki bar jylla kin wan leh khaïi bad kamai spah shane bad knieh lut ïa ka pliang ja bad ka kam ka jam jong ki paradoh parasnam.
“Ka seng ka la pynsngew ruh sha kitei ki nongpynïaid ba ha ki dukan thoh ‘teem’, kiba bun kiba pynïaid ki dei ki bar jylla ki bym don ïa ki kot ki sla kiba biang kaba long be-aiñ bad kane ka la pynlong ïa ka seng ba kan nym lah ban shu sngap ba ki bar jylla kin wan leh khaïi bad kamai spah shane bad knieh lut ïa ka pliang ja bad ka kam ka jam jong ki paradoh parasnam”, la kubur u Bah Dkhar.
Ka HNYF ka la pynlong ïa ka jingkhynra laisen ha ki taïew kiba dang shu dep ha ki thaiñ Garikhana ter ter haduh Motphran. Hapdeng katei ka jingkhynra ka la mih ruh ka jingkulmar hapdeng ka seng bad ki Khasi kiba shong dukan thoh ‘teem’ hynrei ka seng ka la kren shai ba kam don daw eiei bad ki paradoh para snam lajong ba kin leh ïa kano kano ka kam tangba ka seng ka kwah pat ban tip ba ka kam kan dei beit katkum ka lynti kaba dei bad ym ba kan long be-aiñ.
