Shillong, Risaw:
U Rakkam A Sangma uba dei u Myntri ka sorkar jylla bad ruh u MLA ka Rongara Siju konstitwensi u la pynpaw ka jingsngewkhia halor ka jinglong jingman jong ki surok ha Ri-lum Garo kiba la sniew bad buh jingeh ïa ki paid nongleit nongwan.
Ha kaba ïadei bad ka jingsniew jong ki surok bad khamtam jong ka surokbah kiba la sdang ban jot bad bun ki thliew ki syar, u Rakkam u ïathuh ba shen un sa ïakynduh ïa u Symbud Myntri Rangbah ba khmih ïa ka tnat PWD (Roads) bad kumjuh ruh ïa ki Deputy Commissioner (DC) ka thaiñ Ri-lum Garo ban ïakren halor ki lad ki lynti ban shim ban pynbha bad maramot ïa ki surok hapoh ka thaiñ.
Haba kren sha ki lad pathai khubor u Rakkam u la ong ba ki surok hapoh ka Ri-lum Garo naduh Baghmara, Nogaon shaduh Dalu khamtam ki surokbah ki la sdang ban sniew kaba la long shisha ka jingeh na ka bynta ki nongleit nongwan jong ka thaiñ.
Ha kajuh ka por, u Rakkam u la pyntip ruh ba ka Ministry of Road Transport and Highways ka Sorkar Kmie ka la mynjur ïa ka jingtyrwa ka sorkar Meghalaya ban kyntiew ïa kine ki surok sha ki surokbah (National Highway) namar ki dei ruh ki surok kiba pyndonkam da kiwei pat ki nongshong shnong ki jylla ka thaiñ shathei lam-mihngi.
U la Rakkam u la ong ba kawei na ki jingeh ha ka ban pynheh ïa ki surok sha ki surokbah ka dei ban ïoh jaka namar ka jaka la long trai da ki riewshimet. “Ka jingeh ban kyntiew ïa ki surok sha ki National Highway ka dei hi namar ka jingeh ban ïoh jaka hynrei na ka liang ka sorkar ka la shim khia bad dang shen nga la dep ban lum ka jingïalang ha Baghmara bad nga la ïoh jingtip ba shen yn sa ïoh noh ïa ki jaka ban pynheh ïa ki surok hapoh ka Ri-lum Garo,” la ong u Rakkam.
Ha kajuh ka por, u Rakkam u la pyntip ruh ba ka Ministry of Road Transport and Highways ka Sorkar Kmie ka la mynjur ruh ban ïarap pisa haduh T.6 klur ban pynbha ïa ki surok ha Ri-lum Garo bad u la pynpaw ba katkum ka jingsngewthuh shimet kane ka pisa kaba la mang ka dang long kaba rit eh ban pynbha ne maramot ïa ki surok.
