Shillong, Risaw 11
U Vice Chairman ka National Institution for Transforming India (NITI Aayog), u Suman Kumar Bery u la ong ba ban don ka buit pyntreikam pynroi ka bym ieh shadien ïano-ïano, dei ban don ka jingkhuslai na ka bynta ki 200 million ki riewlum ha India, haba pynkynmaw ba u Myntri Rangbahduh ka ri, u Narendra Modi ruh u phaikhmat bha sha ki riewlum bad ki jaitbynriew riewlum kiba dei ki bynta ba kongsan jong ki nongshong shnong ka India.
U Bery kum uwei na ki khliehduh ka NITI Aayog ka kynhun kaba long kum ka nongai buit ïa ka Sorkar Pdeng, u la wan sha Meghalaya ha kaba u la ïakynduh ïa ki ophisar ka Sorkar Jylla, bad leit jngoh ruh ïa ka shlem treikam ka Hima Mylliem ha ka jingdonlang u CEM ka KHADC Bah Pynïaid Sing Syiem bad kiwei ki Executive Member ka KHADC bad kiwei kiwei.
U Bery u la ong ba u Myntri Rangbahduh ka ri u phaikhmat bha sha ki riewlum bad ki mat kiba ïadei bad ki paid riewlum kiba dei hi ki bynta jong ka ri kum ki nongshong shnong.
U la ong ba lada ym kyrshan lyngba ki skhim bapher bapher jong ka ri, ka long kaba donkam ba lada kwah ban don ka buit ka ban kyntiew ïa ka roi ka kiew ha ka ri khlem da ieh ïano-ïano, donkam ban khuslai na ka bynta ki 200 million ngut ki riewlum ha ka ri.
U la ong ba man la ka jaka kaba sha kyndong tam jong ka ri ka don la kajong ka jingphet, u Bery u la ong ba ka NITI Aayog ka peit ïa ki Jylla bad u Myntri Rangbahduh u u jingong bad ngeit ba ka India ka kiew lada ki Jylla ki kiew
Halor ka jingbuh kyrdan kham shadien ïa ki Jylla kum ka Meghalaya lyngba ki kaiphod ba pynmih ka NITI Aayog, u Bery u la ong ba ka NITI Aayog ka ju pynmih bun tylli ki jingbuh kyrdan bad ïa kane ka Sorkar Meghalaya ka sngewthuh bha bad smat ban shim ki lad ki lynti la ka dei ki skhim Sorkar Pdeng ne kiwei ki lad ban wanrah skhim na bynta ka Meghalaya bad ki don shibun ki jingjop.
U ong ba ka Meghalaya ka don la ki jong ki jingeh naduh ka jingbun ki shnong ki thaw ki jaka pule kiba dei ban beh lang sha ka kyrdan kaba kham biang bad kham shalor.
Haba kylli shaphang ka ïoh ka kot jong ka Jylla hapdeng ki jingeh babun, u Bery u la ong ba um wan hangne ban bishar, hynrei ban peit kumno ban lah ban pyndonkam ïa ka NITI Aayog ban kyntiew ïa ka Jylla.
