Shillong, Risaw 11
Ka dei ka sien banyngkong ba uwei na ki heh ka NITI Aayog un leit kiew bad ïuhkjat hapoh ka shlem treikam ka Hima Mylliem; kawei na ki Hima Khasi ha kane ka Jylla kaba pynïaid ïa ki kam hapoh ka jingpeit jingkhmih lang jong ka Khasi Hills Autonomous District Council (KHADC).
Une u heh ka NITI Aayog u dei u Vice Chairman, u Suman Kumar Bery uba la wan khnang sha shlem treikam ka Hima Mylliem ha Mawkhar bad u la ïakynduh ïa u Syiem ka Hima Mylliem u Pa’iem Ainam Manik Syiem ha ryngkat ka jingdonlang u Chief Executive Member ka KHADC, u Bah Pynïaid Sing Syiem lem bad ki Executive Member kiba kynthup ïa u Bah Alvin Sawkmie bad u Bah Fantin J Lakadong bad kiwei kiwei.
Ha kane ka jingwan jong une u heh ka NITI Aayog, la pdiang sngewbha ïa u da kaba pynkupburom da ka jaiñ ryndia bad ka jingïakynduh kaba lyngkot.
Na ka liang u Syiem ka Hima Mylliem u la batai shaphang ka Hima Mylliem kaba la don naduh u snem 1853 ha kaba u la aiti ruh ïa ka Hima Mylliem Act nalor ka dorkhas ha u Vice Chairman ka NITI Aayog, u Suman Kumar Bery.
U Suman Kumar Bery u la ong ba ka jingwan jong u sha Meghalaya ka dei kaba long kyllum, kynthup ïa ki mat kiba ïadei bad ki riewlum kumba la phaikhmat bha da u Myntri Rangbahduh ka ri ha kaba ka Thaiñ Shatei Lam Mihngi kynthup ka Meghalaya ka dei kaba don ki paid riewlum.
U la ong ba kane ka dei ka sien leit jngoh kaba nyngkong jong u ïa kano-kano ka Jylla ha ka Thaiñ Shatei Lam Mihngi bad u da don eh ka jingkwah ban tip ïa ka long ka man ki Jylla riewlum. U la ong ruh ba u kwah ban tip ïa ka rukom treikam ki bor synshar ha Meghalaya kum ka District Council bad ki bor ba ki don bad ki riti ki dustur kiba ki don.
