Shillong, Risaw 12
Ka Raid Nongshken, kaba hap hapoh ka Hima Khyrim, ka la maham tyngeh ïa kino kino ki kynthei Khasi kiba ïoh kurim da ki nong Bangladesh ba kim bit satia ban wan ïalam sha ki shnong ki thaw kiba hap hapoh u pud u sam jong 7 tylli ki Dorbar Shnong kiba don hapoh ka raid.
Haba kren sha ki lad pathai khubor ha ka Sngi Palei ha Shillong Press Club, u Sordar ka Raid Nongshken, Bah Sukher Nongrum, u la maham ba kino kino ki kynthei ba shong ba sah ha 7 tylli ki shnong kiba hap hapoh ka raid kiba ïoh kurim da ki bar jylla khamtam ïa ki nong Bangladesh kim bit ban wan ïalam ïa ki shapoh shnong khamtam ïa kito kiba ju mlien ban pynpaw pyrthei ha ki rynsan ‘social media’ bad sngew sarong ba ki ïoh kurim da ki bar jylla.
“Kino kino ki kynthei lane ki longkmie kiba ïoh lok da ki bar jylla khamtam ïa ki nong Bangladesh bad kiba leit sah shapoh Bangladesh lane kiba ïalam ïa kita ki kurim jong ki kiba na shabar, kane ka dei ka jingmaham ba kim bit ban wan ïalam ha kano kano ka shnong napdeng kine ki 7 tylli ki shnong hapoh ka raid jong ngi bad lada ngi lap ïa kino kino ki kynthei lane ki longkmie kiba leh tam bad ïalam ïa ki briew na Bangladesh shaduh sha Shillong bad kiba shongkha bad ki bar jylla, na ka liang ka raid kan leh da kaba donkam bad katkum ki bor jong ka shnong,” la ong u Sordar.
U Sordar u la ong ba ka long be-aiñ ïa ki nong Bangladesh ba kin wan rung shapoh India khlem kino kino ki kot ki sla kiba dei kum ka Passport bad khamtam eh ba kin wan rung katba mon bad sah hapoh ka raid namar kane ka wanrah ka jingma kaba khraw.
Katei ka jingmaham kaba la pynmih da u Sordar jong ka Raid Nongshken ka dei hadien ka jingjia kaba la jia ha ka 8 tarik Risaw, 2023 halor ka jingkynnoh ba kawei ka longkmie ka la shah jrong kti ha ki katto katne ki briew kiba la buaid kyiad.
Katkum ka jingong jong u Sordar ka raid, katei ka longkmie kaba la shah kynnoh jrong kti ka dei kaba ju leit bha shapoh Bangladesh.
