Shillong, Risaw 12
Ka Sorkar Jylla ka la wad jingtip ba haduh mynta, ym don na Meghalaya kiba ngat ha ka jingkylla ka rel ha Bihar kaba la jia ha ka miet Sngi Balang, hynrei ka Sorkar Jylla ka dang bteng ban tyrwa ki lad jingïarap ïoh shu don mano mano kiba dei na kane ka Jylla kiba mad jingeh bad ngat ha kane ka jingjia.
Ka Myntri Sorkar kaba dei ruh ka nongaiktien ka Sorkar MDA, ka Kong Ampareen Lyngdoh ka la ïathuh sha ki lad pathai khubor ha ka Sngi Palei ba ka Sorkar Jylla katkum ba la wad jingtip, ym don mano mano na Meghalaya kiba don ha ka thup kyrteng jong kito kiba ngat ha ka apot kum ka jingkhlad ne mynsaw namar kane ka jinghap ka rel Delhi-Kamakhya North East Express kaba la jia ha Buxar district ha Bihar ha ka miet Sngi Balang.
Ka Kong Ampareen ka la ong ba ka Sorkar Jylla ka la thaw ki lad ban lap ïa ki briew ka Jylla ïoh don kiba ngat ha ka apot namar kane ka jingjia, hynrei haduh mynta ym don mano mano na ka Jylla kiba don kyrteng ha ka thup jong ka tnat rel.
Ka la ong ba u Myntri Rangbah ka Jylla u Conrad K Sangma u la ïakren bad ki bor bahalor ka tnat rel kiba don ha kato ka jaka ba jia bad lada jia ba don mano mano ba mad jingeh ki bym pat ïoh jingtip, ka Sorkar ka la buh u helpline number lane u nombar ban ïarap.
Une helpline number u dei 1800-345-3644 na ka bynta ki briew ka Meghalaya kiba lah ban donkam jingïarap namar kane ka jingkylla ka rel Delhi-Kamakhya North East Express ha Bihar.
Kane ka Myntri ka kyrmen ruh ban nym don mano mano na Jylla kiba ngat ha ka apot namar kane ka jingjia, bad ka la bynrap ba ka Sorkar Jylla ka dang bteng ban wad jingtip ïoh don mano mano ba mad jingeh kiba dei na kane ka Jylla.
Nalor u helpline number 1800-345-3644, ka Sorkar Meghalaya ka la pyntip ba lada don kiba donkam kyrkieh ki lah ban phone ha kine ki briew bad ki nombar phone harum na ka bynta ban lah pynpaw ïa ki jingeh.
K. Thabah, Meghalaya House Guwahati – 7896167945, I. Kharmon, District Transport Officer, Ri-Bhoi District – 887003923, Richie Momin – 9615208771 bad Hubert Nongbri – 7005627065.
