Shillong, Risaw 13
U Chief Executive Member ka Khasi Hills Autonomous District Council uba dei ruh u MDC ka NPP na Sohryngkham konstitwensi, u Bah Pynïaid Sing Syiem u la ong ba u la pynkhreh ïa ka ilekshon, bad ki paidbah ruh ki tip ïa ki briew kiba trei ym ïa kito kiba shong ha ïing bad mih ban ïaleh ilekshon.
U Bah Pynïaid u la pynpaw ïa kane mynta ka sngi ka 13 tarik Risaw, 2023 haba jubab ïa ka jingkylli halor ka jingpynkhreh ïa ka ilekshon MDC ha u snem 2024, khamtam hadien ba la don kiba pynphriang khubor ba ka ilekshon MDC kan long ka 27 tarik Rymphang, 2024.
U Bah Pynïaid u la ong ba kum u MDC u la trei shibun ki kam bad haba wan ka ilekshon, ka dei ka bynta jong baroh ki seng saiñ pyrthei ban pynkhreh bad ban leit sha ki paidbah bad lum ïa ka jingïalang ban pynkynmaw ruh ïa ki paidbah ïa ki kam namar haba la trei, ka dei ban pynkynmaw ïa ki kam kiba la leh, wat lada ym lah ban leh lut baroh.
“Ki paidbah ki tip ïa ki briew kiba trei bad haba ïakhun ïa ka ilekshon da ka jingtrei shitom, ka don ruh ka jingsngewtynnad ym da kaba shu shong ha ïing bad mih ban ïakhun ïa ka ilekshon,” la ong une u CEM ka KHADC.
Haba ïadei bad ka jingsaphriang khubor ha social media ba ka ilekshon MDC kan long ha u Rymphang 2024, u Bah Pynïaid u la ong ba haduh mynta ym pat ïoh kano kano ka khubor halor kata bad lada dei ba pynbna ïa ka ilekshon, ki kyndon pyrkhing ilekshon lane Model Code of Conduct ruh kin treikam. Hynrei ym pat ïoh kano kano ka jingtip kaba thikna haduh mynta.
