Shillong, Risaw 13
Ka Laban Puja Committee ka la mynjur ïa ka jingai jingmut jong ka Khasi Students’ Union (KSU) Laban Circle ban nym shna shuh ïa ki Pandal ha ki surok bad ka la kular ruh ban pynbun ïa ki volunteer khnang ban ym pynkhapngiah ïa ka lynti ka syngkien bad ban peit ba ka jinglehniam kan ïaid beit ïaid ryntih khlem pynthut ïano ïano ruh.
Kum ban shu kdew hangne ba ka KSU ha ka 9 tarik mynta u bnai ka la ai da ka dorkhas sha u Chief Engineer ka PWD Roads ban pynpaw ïa ka jingpyrshah halor ka jingtei pandal na ka bynta ban lehniam puja ha surok ba dei peit jong ka PWD namar kane ka wanrah ïa ka jingkhapngiah, jingdheng kali bad ka jingbym sngewtynnad ban ïaid lyngba ki pandal ïa ki bym shim dei niam Hindu.
Ha kaba ïadei bad kane ka bynta na ka liang jong ka shlem treikam jong ka Deputy Commissioner ba la lamkhmat da i Kong D. Kharshiing ba dei peit ïa ka thaiñ Laban ka la khot ka jingïalang kaba kyrkieh ha 13 tarik mynta u bnai ha Laban Police Station. Ha kane ka jingïalang ba la lamkhmat da i Kong D. Kharshiing la don lang ki nongïalam jong ka Laban Puja Committee bad Central Puja Committee, ki nongïalam shnong jong ka Dorbar Shnong Laban, ki ophisar ka shlem treikam PWD, u Officer In-Charge jong ka Laban Police Station u N. Khan bad ki nongïalam jong ka KSU Laban Circle ba la lamkhmat da u President Reuben Najiar bad u General Secretary Jason Laloo.
Ha kane ka jingïalang na ka liang ka KSU Laban Circle ka la pynsngew ïa ka jingujor ka jong ki halor ka jingbym ïahap ban shna bad kyntiew pandal nalor ka surok PWD ba pyndonkam lut ki paidbah.
Na ka liang ka Laban Puja Committee ka la mynjur ïa ka jingai jingmut jong ka seng ban ym shna shuh ïa ki pandal ha ki surok bad shuh shuh ki la kular ruh ban pynbun ïa ki volunteers khnang ban ym pynkhapngiah ïa ka surok bad ban peit ban khmih ba ka jinglehniam kan long kaba ïaid beit ïaid ryntih khlem pynthut ïano ïano ruh.
Na ka liang ka seng ka la buh ruh ka jingmaham ïa ki nongïalam jong ka Puja Committee ba kaba nyngkong ki dei ban peit ïa ka jingkhuid ka jingsuba ha ki jaka lehniam ka jong ki bad ym dei ban bret pathar ïa ki ñiut sha surok bad ha shnong ha thaw, ba kim dei ban pynheh jingrwai palat ïa ka por ba la buh na ka liang jong ka Deputy Commissioner.
Kaba kham kongsan ba kin batai ïa ki para riewniam Hindu lyngba ki lad pathai khubor ne ha kano kano ka rukom kaba ki sngew dei ban leh ba ym bit ïa ki ‘riew lehniam ne ki paidbah ba wan peit ne leh puja ba kin dih buaid bad thaw huri-hura ha ki shnong ki thaw ha ka por puja.
Nalor kata, ka seng ka ju lap ha man ba dei puja ba ki don katto-katne ngut kiba ju shim kabu ha ka por puja ban ïashoh ïadat bad thaw huri-hura ruh ha ki shong ki thaw bad kumjuh ruh bunsien ki aksiden ha ki por mynmiet ki ju jia man la ka por namar ka jingdih buaid palat ki briew ba wan puja.
