Shillong, Risaw 13
U Myntri Rangbah ka Jylla, Conrad K. Sangma ha ka Sngi Thohdieng u la plie ïa ka prokram ba la tip um ka “CM Elevate” ha Tura, West Garo Hills.
U la ong ba ka Sorkar ka la dep mang T.300 klur bad kan kyrshan kumba 20,000 ngut ki nongïoh jingmyntoi.
“Ka India ka don bun bah ki khun samla bad ban kyntiew shuh-shuh ïa ka seng kam seng jam hapoh ka Jylla, ka Sorkar ka la plie ïa ka ‘CM Elevate Programme’. Lyngba kane ka prokram, ka Sorkar kan pynbiang ïa ka jingïarap pisa kaba 75% katkum ki kyndon jong ka skhim,” u la ong.
Ha kajuh ka por, u la ai mynsiem ïa ki briew ban shim kabu ïa ka prokram bad ban sdang ïa ki kam lajong, ha kawei ka liang ka ban thaw ki lad ai kam ai jam, ha kajuh ka por ban ai mynsiem ha ka liang ka seng kam seng jam hapoh ka Jylla. Haba ai jingkren ha kane ka sngi, u la ong ruh ba ki samla hapoh ka Jylla ki la ïoh jingkyrshan na ka Sorkar lyngba ka “Yess Meghalaya” ban sdang ïa ki kam bapher-bapher ki ban hikai bad pynkup bor ïa ki samla.
U la ong ruh ba ka ‘Yess Meghalaya’ ka la kyrshan palat 1000 tylli ki kynhun ha kane ka shi snem ba la dep bad kin dang don bun shuh ki kynhun napoh ka Jylla ki ban ïoh jingkyrshan pisa.
“Ngin kyrshan ïa ki kynhun ki samla ban sdang ïa ki prokram ai jinghikai bad pule-puthi kiba thmu ban pynkup bor ïa ka imlang-sahlang jong ngi. Lyngba kane ka prokram, ngi kwah ïa ki samla jong ngi ba kin ïadon bynta ha ki prokram kiba tei,” u la ong.
U la ïathuh ruh ba ka Meghalaya Grassroot Music Programme (MGMP) ka la kyrshan palat 1500 ngut ki ‘riew donsap ha kane ka shi snem ba la dep bad ha kajuh ka por, la lah ban pynïadon bynta bad kyntiew ïa ka sap ka phong jong ki.
Haba ban jur shuh-shuh halor ka jingkyntiew ïa ka seng kam lajong, u la kren shaphang ka prokram “PRIME” ha kaba la kner ïa ka jingkyrshan pisa sha ki samla.
Haba kren halor ka ‘Green Meghalaya’, u Myntri Rangbah u la ong, “Ngi kwah ban ai mynsiem ïa ka imlang-sahlang jong ngi ban bteng ha ka ban ïada bad pynneh-pynsah ïa ki khlaw ki btap bad ki jingdon-jingem mariang. Ngi kwah ban ai mynsiemïa ki Nokma ban ïada ïa ki khlaw ki btap, ha kawei ka liang ngin kyrshan ïa ka imlang-sahlang da ka jingkyrshan pisa.”
U la ong ba ha kane ka shi snem ba la dep, palat T.30 klur la pyllait sha ka imlang-sahlang ban ïada ïa ki khlaw ki btap. U la ong ruh ba ka Sorkar ka khmih lynti ban kynthup palat 50,000 hektar hapoh kane ka prokram.
Shuh shuh ha kane ka prokram la sam T.1.05 klur sha ki kynhun seng ha shnong kiba dei ban ïoh jingmyntoi hapoh jong ka ‘Community Investment Fund’ bad T.60,98,595 hapoh ka jingsiew na bynta ki kam ba ïadei bad ka mariang.
