Shillong, Risaw 16
Ki nongtrei ASHA kiba don hapoh ka shatri jong ka Meghalaya Asha Workers Union (MAWU) ha ka Lah Sngi U Blei ki la ai por ïa ka sorkar 7 sngi ban pynurlong ïa ki jingdawa jong ki lym kumta kin mih paidbah ban pynlong da ka jingïakhih.
Haba kren sha ki lad pathai khubor, Ka President jong ka MAWU ka Kong June Myrsing ka la ong ba ka Union na ka por sha ka por ka la pynsngew sha ka tnad ka koit ka khiah ban kyntiew ïa ka jingsiew ka jong ki bad ban ai ka jingsumar kaba ym donkam siew pisa ïa ki nongtrei ASHA hapoh ka skhim MHIS hynrei haduh mynta ka sorkar kam pat shim kano-kano ka sienjam ban pynurlong ïa kine ki jingdawa jong ki nongtrei ASHA.
Ka Kong June ka la ïathuh ba na ka por sha ka por ki nongtrei ASHA ki la pynsngew sha ka tnad ka koit ka khiah ba kum ki nongtrei kim lah im shuh ban trei tang da ka jingsiew kaba rit kaba long T.2000, namar kane ka buh jingeh ïa ki ASHA ban pyndap pynbiang ïa ki jingdonkam ha ïing ha sem.
“Watla kine kidei ki jingdawa ba la slem bha hynrei haduh mynta ka Myntri ka tnat ka koit ka khiah kam pat lah ban pyntikna ba ka tnad ka lah ne em ban kyntiew ïa ka bainong ki ASHA”, la ong ka Kong Myrsing.
Ka Kong June ka la ïathuh ba na ka liang ka Myntri ka tnat ka koit ka khiah ka ka phah wan biang ïa ki ASHA hadien 10 sngi ka jingïakynduh ba nyngkong kaba dei mynta ka 16 tarik, Risaw. Hynrei kaba lyngngoh ka long ba ka Myntri ka la pyntip sha ki ba kam lait satia ban ïakynduh ïa ki nongtrei ASHA ha katei ka sngi.
Ka Kong Myrsing ka la ong ruh ba ka Union ka la dawa ba dei ban thaw ïa ka Grievances Committee ban khmih haba ïadei bad ka jingshah weng kam ne shah pynkynriah ki nongtrei ASHA. Pynban haduh mynta ruh ka tnad ka koit ka khiah kam pat shim ïa kano-kano ka sienjam ban thaw ïa ka Grievances Committee.
“Ka Myntri ka tnat ka koit ka khiah ka la kular ban thaw da ka Grievances Committee ban khmih ïa ka bha ka miat ki nongtrei ASHA, hynrei haduh mynta kane ka jingkular ruh ka la shu sah tang ka jingkular namar haduh mynta ki dang don ki ASHA kiba shah weng ne shah pynkynriah na kawei ka CHC ne PHC sha kawei pat”, la bynrap pynkut ka Kong Myrsing.
