Shillong, Risaw 16
Hadien ki jingpluh kiba shyrkhei kum ka jingjia ha Thana Road ha Khyndai Lad, ka Sorkar Jylla lyngba ka tnat Disaster Management ka la ïakren bun ki jingduna kiba donkam ban pynbha haba ïadei bad ki jingjia kiba wan lynshop kum ka jingpluh, jingtwa bad jumai.
Ha ka jingïakren kaba la long ha ka Lah Sngi U Blei hapdeng bun tylli ki tnat treikam ka Sorkar ha Secretariat, la ïakren shaphang ka jingma lada jia kano-kano ka jingshah lynshop khamtam ha ki jaka ba khim ki lynti ïaid bad ki surok, nalor ka jingkhah ki ïing khamtam eh ha ki jaka ba long ïew namar ka jingbun ki paidbah bad ka jingkhapngiah.
Ka tyllong khubor ka ïathuh ba la ïatai sani kumno ban shim jingkheiñ lypa noh ïa ki jaka kiba kham don jingma naduh ki ïing maw bad ki ïing dieng kiba la don da ki phew snem, ban khmih bniah ïa ka jingshngaiñ jong ki ïing (structure safety audit) lada jia ka jingpluh ding, nangta ki jaka kiba donkam ban buh lypa ïa ki kor um ban tan um haba pynlip ding (fire hydrant), ka jingdonkam ban tip lypa ïa ki jaka pyllang um.
“Ki don kumba 42 tylli ki jaka kiba pyllang um bad kumba 2.5 klur litar ka um. Kum ïa kine ki jaka donkam ban ithuh lypa ha kaba yn buh ruh ïa ki jaka tan um ban pynlip ding (fire hydrants) ha ki jaka ba kham donkam eh khnang ban ïoh tan um ha ka por ba jia ki jingjia kum ka jingpluh kaba jur,” la ong u Commissioner & Secretary ka tnat Disaster Management u Sanjay Goyal.
U la ong ba donkam ruh ban khmih bniah ïa ki ïing maw ne ïing dieng kiba la rim bad bun snem ka rta jong ki.
U la ong ïa kane donkam ban sdang shwa na ïing Sorkar kiba la kham jrong ka rta khnang ban tip ïa ka jingshngaiñ jong ki ïing lada jia ka jingpluh bad jingkhlaiñ jong ki ïing bad yn sa buh da ka kynhun kaba tip bad shemphang bha.
