Shillong, Risaw 16
Ki nongshet ja sngi ha ki skul bapher bapher ka jylla kiba don hapoh ka shatri jong ka Union of Cook Cum Helpers, PM Poshan Meghalaya ha ka Lah Sngi U Blei ki la byrngem ba kin sangeh treikam noh lada ka sorkar jylla kam siew satia ïa ka bainong jong ki kaba manla u bnai watla na ka liang jong ka sorkar ka la kular ba kan siew ïa ka bainong kaba 6 bnai hynrei ka la siew tang 3 bnai.
Haba kren sha ki lad pathai khubor ha Shillong Press Club, ka President jong ka Union of Cook Cum Helpers, PM Poshan Meghalaya, ka Kong Banalis Syiem ka la ong ba kum ki nongïalam ki don ïa ka jingsngewkhia kaba khraw shikatdei eh ha kaba ka bainong jong ki kum ki nongshet ja skul jong ka jylla kaba ki dei hok ban ïoh ki khlem ïoh satia.
“Na ka liang jong ka sorkar ka kular ba kan siew ïa ka bainong kaba 6 bnai, hynrei haduh mynta hi ka sorkar ka khlem siew ïa ngi ïa kine ki 6 bnai, hynrei ka dang ai ïa ngi tang 3 bnai”, la ong ka President.
Katei ka President ka la ong ba nalor ba ka jingsiew ïa ki nongshet ja skul ka long kaba duna, hynrei mynta ka sorkar ka la set sa ïa ka bainong jong ki kaba la wanrah jingeh shikatdei eh ïa ki ba kin pyndap ha ïing ha sem nalor ba ki ïoh lypa ïa ka jingsiew kaba tang 10 bnai.
Katei ka kynhun ka la shim ruh da ka rai ba lada ka sorkar kam siew ïa ka bainong jong ki mynta u bnai, ka kynhun ka la shim da ka sienjam ban sangeh treikam ban leit shet ja ha ki skul ka ban treikam ha baroh kawei ka jylla Meghalaya. Ha u Naiwieng 2023, lada ka sorkar kam kitkhia ban leh eiei halor kane ka bainong jong ki nongtrei, ka kynhun kan mih sha madan ban ïakhih.
“Kumta ngi la ïa rai da kawei ka jingmut ba na ka liang jong ka Union, lada ka sorkar kam siew dep noh ïa ngi ïa kine ki bnai kiba ngi la dep trei, ngi la rai ban sangeh ban leit shet ja sha ki skul tat ynda ka siew ïa ka bainong kaba ka dei ban siew”, la kubur ka President.
Ka Kong Syiem ka la ïathuh ba ka Union ka la phah ruh da ka jingthoh sha ka sorkar pdeng ban pynkiew noh ïa ka bainong jong ki hynrei haduh mynta kam shym la don kano kano ka sienjam ba la shim da ka sorkar.
Ka Kong Syiem ka la ïathuh ba ki nongshet ja sngi ki ïoh ka jingsiew kaba T. 2,000 ha ka shibnai ha kaba T. 1,100 ka dei kaba siew da ka sorkar jylla bad T. 900 ka dei ba la siew na ka sorkar pdeng. Ka bainong kaba kitei ki nongshet ja ha ki skul ki khlem pat ïoh kadei jong u Naitung, Nailar bad Nailur.
