Shillong Risaw 17
Kum ka jingshimkhia ban ïakhun ïa ka jingkynrei kiba die bad dih drok, u Myntri ka tnat Social Welfare u Bah Paul Lyngdoh u la lum lang ïa ki Rangbah Shnong jong ki shnong bapher bapher kiba hap ha West Shillong konstitwensi ban ïatai halor kumno ban ïakhun pyrshah ïa ka jingjyllei u drok lyngba ka jingdon bynta lang ki dorbar shnong nalor ki kynhun niam bapher bapher, bad ban nym saja ki briew kiba wan sakhi haba shah kem kiba khaïi drok.
Ïa ka jingïalang bad ki nongkitkam shnong na 10 tylli ki shnong hapoh ka West Shillong konstitwensi la pynïaid da u Bah Paul ha ka jingdonlang ki pulit ophisar bad ki ophisar ka tnat Social Welfare bad Deputy Commissioner ka East Khasi Hills district.
Haba kren sha ki lad pathai khubor hadien ka jingïalang, u Bah Paul u la ong ba kane ka jingïalang ka long kum ka jingbteng hadien ba la dep ïakynduh bad ki kynhun niam bapher bapher ban ïakhun pyrshah ïa ka jingsniew jong u drok.
U Bah Paul u la ong ba ha kane ka jingïalang la ïoh shibun jingmut na ki nongkitkam shnong bad la ïakren kumno ban pyndonbynta lang ïa ki shnong ha kane ka jingïakhun ïa ki jingsniew khamtam u drok namarba ha ka kpait saiñ kam (policy) ruh la don lypa ka jingbatai ban donbynta lang ki shnong.
U la ong ba la ïakren ban phah ka jingtyrwa ha ryngkat ka tnat pulit ban don ki kyndon kiba kham pyrkhing ban nym don ka jingeh ne saja ïa ki briew kiba wan sakhi haba shah kem kiba die drok.
“Ngi la ïohi ïa ka jingjop ha ka jingïakhun pyrshah ïa u COVID da ka jingdonbynta jong ki shnong ki thaw bad ngi khmih lynti ruh ba da ka jingïatreilang ngin lah ban jop ha ka jingïakhun pyrshah ïa u drok,” la ong u Bah Paul.
U la ong ruh ba ki shnong ha West Shillong ki don ha ka thup ba jur u drok bad donkam ban tehlakam bad shim ïa ki sienjam kiba dei.
U la ong ba kane ka jingïakynduh bad ki shnong ka sdang shwa na West Shillong bad kan sa nang bud sa bad kiwei pat ki shnong.
U la ong ba ki district kiba kham bun bha ka jingkurup drok ki long ka East Khasi Hills, East Jaiñtia Hills bad Ri -Bhoi.
Halor ki jingeh ki nongkitkam ba ki mad haba dei ban kurup ïa kiba die drok, u Bah Paul u la ong ba ka jingeh ka dei ba ki nongkitkam shnong ki hap ban pyntip shwa sha ki pulit haba don kiba khaïi drok.
U la ïathuh ruh na ka liang jong ki paidbah ki lah ban pyntip sha ki pulit lyngba u number 112 lada ki lap ïa ki briew kiba donkti ban khaïi drok.
La ïakren ruh halor ka jinglait jamin ki briew kiba khaïi drok, bad haba ïadei bad kane, ka Sorkar ka la thaw ïa ka advisory board ban peit halor kane bad na ka liang ka tnat pulit kan phah ïa ki kyrteng sha kane ka Board ba kin peitbniah.
Ka Sorkar ka hap ban pynkhlaiñ bha khnang ba kito kiba donkti kin hap ban shong patok 3 snem.
Shuh shuh na ka liang u Bah Paul u la ong ban pynduh ïa u drok dei ban sdang pynduh na ka jaka kaba khlaiñ bha ka jingkhaïi ïa u drok.
Na ka liang u Myntri u la bynrap ruh ba ka donkam ïa ka jingïatrei lang bad ki shnong ki thaw, bad kyntu ruh ïa ki shnong ban pyntip lada don ki briew kiba ngop ha une u jingdih khnang ba ka Sorkar kan lah ban leh ïa kaba donkam kata ban ai jingsumar ïa ki, ha ki rehabilitation centre kiba la bei pisa da ka Sorkar jylla khlem kano-kano ka jinglut.
