Shillong, Risaw 19
Hadien katto-katne sngi ba ka Raid Nongshken kaba hap hapoh ka Hima Khyrim ka la maham da kaba tyngeh ïa kino-kino ki kynthei ne ki longkmie Khasi napoh ka Raid kiba ïoh lok da ki bar jylla khamtam da ki nong Bangladesh ba kim bit satia ban wan ïalam ïa ki sha ki shnong ki thaw kiba hap hapoh u pud u sam jong hynñiew tylli ki Dorbar Shnong kiba don hapoh ka Raid. Hapdeng kane ka jingmaham la ïohi pat ba ha ka janmiet jong ka 17 tarik mynta u bnai Risaw, ka la don kawei ka longkmie kaba la pynkheiñ ïa kane ka kyndon jong ka shnong da kaba wan ïalam ïa u nong Bangladesh hapoh ka Raid.
Katkum ki tyllong khubor la ïathuh ba hadien ki nongshong shnong jong ka shnong Mawdang kaba hap hapoh ka Raid Nongshken ki la ïoh jingtip ba u la don uwei u nong Bangladesh uba la wan rung hapoh shnong poh thaw ki la pynlong ka jingtohkit kaba bniah bad ka jingwad ïa utei u briew.
Ha katei ka jingwad ïa utei u nong Bangladesh, ki nongshong shnong ki lap ïa utei u briew na kawei ka ïing sah jong kawei ka longkmie. La ïathuh ruh ba utei u nong Bangladesh u dei ba la tip kyrteng kum u Alam Mohammad Ser uba na Ratargul, Bangladesh.
Na ka liang u Sordar jong ka Raid Nongshken, Bah Sukher Nongrum u la ïathuh ba hadien ka jingwad ïa utei u briew da ka bor shnong, la ïoh ban bat bad ban sei ïa utei u nong Bangladesh na ka kamra thiah jong katei ka longkmie ha kaba utei u nong Bangladesh u la ong ba u dei u lok jong katei ka longkmie bad u wan na Bangladesh ha kine khyndiat sngi.
Shuh shuh na ka liang ka bor shnong bad ka raid ki la pynlong ïa ka jingtian bishar ïa kitei arngut bad hadien ba la pyndep ïa ki kyndon jong ka raid, na ka liang ka raid la aiti noh ïa utei u nong Bangladesh sha ki pulit ba kin leh ïa kaba donkam.
