Gaza, Risaw 22 (UNI)
Ka jingïap ki nong Palestine na ka jingshah ther bom ha ka Israel ha Gaza Strip ka la kot sha ka 4,651 ngut, la pyntip ka tnat ka koit ka khiah ba la pynïaid da ka Hamas ha ka Sngi U Blei.
Nalor kitei kiba la khlad, ki don sa kumba 14,245 ngut ki nong Palestine kiba la mynsaw na ka jingshah thombor, la ong katei ka tnat. Ka la ïathuh ruh ba napdeng kiba ïap, 1,873 ngut ki dei ki khynnah bad 1,023 ngut ki dei ki kynthei.
Ha kajuh ka por, ha ki 24 kynta ba la leit noh, ki la don kumba 266 ngut ki nong Palestine kiba la khlad na ka jingshah ther bom ha ka Israel ha Gaza, la ïathuh u Ashraf al-Qedra, uba dei u nongaiktien jong ka tnat ka koit ka khiah, ha u kyrwoh khubor.
Ka jingthombor ka Israel da ki bom ka long hadien ba ki lehnoh Hamas ki la leit hiar thma ïa ka Israel ha ka 7 tarik Risaw, bad haduh mynta, ki la don kumba 1,400 ngut ki nong Israel kiba la ïap.
