Nongstoiñ, Risaw 22
U President ka Khasi Students’ Union (KSU) u samla Lambokstarwell Marngar u la ong ba ki kot kiba pule ha ki skul la ki long ha ki jaka pule bapher-bapher wat ha ka skulbah NEHU, ki don la ki jong ki jong ki lynnong, hynrei u la kyrpad ïa ki hep barit khamtam ïa ki samla pule ba kim dei ban klet pat ïa ka lynnong jong ka jaidbynriew.
Ïa kane u samla Lambokstarwell u la kren bad pynpaw kum ka jingkyntu ïa ki samla pule bad ki khynnah skul ha ka jingïalang pynkup burom ïa ki samla pule kaba la tip ruh kum ka “Wickliffe Syiem Excellence Award 2023” ïa kaba la pynlong da ka KSU West Khasi Hills District Unit ha ka Sngi Saitjaiñ ha NSS Hall.
U la bynrap da kaba ong, “Lada ngi klet ïa kata ka thymmei ngi klet noh pat ïa kita ki jinglong kyrpang jong ka jaidbynriew. Nga sngew ba kata ka jingjrong jong ka kyrdan pule ka long sep ei bad dei halor katta ka nongrim ba ka KSU na ka por sha ka por ka ju don ïa kum kine ki lympung ban ai jingithuh, ban ai ka jingai mynsiem ïa ki samla pule bad ngi ju kyntu ïa ki samla pule ban pyndonkam hok ïa ka por katba dang biang.”
Haba pynsngew ïa ka jingthmu jong ka prokram, u samla Lambok u la pynkynmaw ba ha ki khyndiat snem ba la dep, ki don ki lad pathai khubor kiba leit kylli jingkylli na ki khynnah skul ha ka lyngkhuh sngi khlad u Syiem Tirot Sing bad don kiba ong ba u Tirot Sing u dei u nongthoh kot.
“Kaei kaba pynlong ïa ka KSU ba teng-teng kum ka jaidbynriew khamtam ki samla bad ki hep barit lada ngi klet noh ïa la ka jong ka mynnor, lada ngi klet noh ïa la ka jong ka pakit ngin khmih lynti kumno ba kiwei kin wan thoh pat ïa ka ‘history’ jong ka jaidbynriew jong ngi,” u la ong.
Ha katei ka sngi ki don kumba 17 ngut ki samla pule kynthei bad shynrang kiba la wan shakhmat ha ki jingpule bapher-bapher jong u snem 2022 bad 2023 kiba la shah pynkup burom.
Nalor ka jingpynkup burom ïa ki samla pule da u President bad nongïalam ka seng, ka KSU-WKH ka la ïoh ruh ban ai da ki jingai sngewbha sha 12 ngut ki heprit kiba dei ki khynnah skul ïa kaba ka KSU ka kyrshan skul ïa ki.
Ha katei kajuh ka sngi, ka Khasi Students’ Union (KSU) West Khasi Hills District Unit ka la ïoh ban pynlong ïa ka jingkynmaw burom ïa ka lyngkhuh sngi khlad kaba 35 jong u Syiem Wickliffe, u Syiem Khynnah jong ka Nongstoiñ ha kaba kum ka dak jong ka jingkynmaw burom ïa u, na ka liang ka KSU, ka la ïoh ban pynlong ïa ka jingsngap jar kaba shi minit lem bad ka jingbuh syntiew ha u mot ba la tei nam ha kawei na ki jaka hakhmat ka Ïew Nongstoiñ, kumjuh ha kawei na ki jaka ha Phudjaud, Porsohsat, West Khasi Hills da ka jingïashim bynta jong ki nongkitkam ba hakhmat ka KSU West Khasi Hills ba kynthup ïa u samla John.F.Nongsiang, President KSU-WKH, u samla Franklin Syiemïong, General Secretary bad kiwei.
