Nongstoiñ, Risaw 23
Ki ar tylli ki kynhun seng na West Khasi Hills ba kynthup ïa ka West Khasi Student Union (WKSU) Sengkmie lem bad ka United Hynñiewtrep Movement (UHM) West Khasi Hills ki la pynpaw ïa ka jingkyrshan kaba pura sha ka Federation of Khasi Jaiñtia & Garo People (FKJGP), West Khasi Hills kaba la khang tala shuwa shi por ïa ka jaka tylliat maw ka kompeni shna surok na Nongstoiñ sha Wahkaji.
Ha ka kyrwoh khubor ba la phah, kitei ar tylli ki kynhun seng ki la pynpaw ba ka jingkyrshan ka jong ki ïa ka FKJGP ka long katkum ka nongrim ba ka FKJGP ka ïeng skhem.
Ki la ong ruh ba ki daw ba katei ka seng kumba ki la pynsngew, ka long ba ka pyrshah halor ka jingbym ïatreilang jong katei ka kompeni pyntrei surok ban pynbiang shuwa ïa ki kot ki sla kiba long aiñ lyngba ki tnad sorkar bapher-bapher, na ki tnad jong KHADC, na ka hima bad na ki shnong ki thaw kumjuh kiba long katkum ki rukom bud ryntih lyngba ki jingai jingbit ha shuwa ban pyntrei ha kino-kino ki kam ba ïatyngkhuh bad katei ka kompeni shna surok.
“Hooid ym lah ban len na ka liang jong u paidbah ki angnud dik-dik ba katei ka kompeni kan pyndep noh kham kloi ïa katei ka surok hynrei ki don ki kyndon ba katei ka kompeni kan hap ban pynbit pynbiang shuwa ïa ki jingdonkam baroh khnang ba kino-kino ki kompeni kiba wan trei ïa kano-kano ka roi ka par ha ki ki surok, ki lynti syngkien kin ym shim kabu ne leh matlah than ïa ki rukom pynïaid kam jong kino-kino ki bor ba dei khmih ha ki jingïoh jingbit lada dei na ka Sorkar ne kino-kino ki bor ba dei peit ïa ki kyndon aiñ ha shuwa ban pyntrei ïa kino-kino ki kam,” la ong ka kyrwoh khubor.
Ki la pynpaw ruh ba kum ki kynhun seng ki kwah dik-dik ban pyntrei ïa kitei ki surok hynrei ïa mynta shipor la kumno-kumno katei ka kompeni kan hap pynbiang shuwa khamtam ïa ki kot ki sla kiba long katkum ki kyndon aiñ ba dei ban bud ryntih.
“Ha ka jingshisha kumban shu pynpaw hakhmat jong u paidbah, ka jingwan katei ka kompeni shna surok – ngi ki paidbah ngi khmih lynti shibun ba ki nongshong shnong ka thaiñ kin ïa ïoh bylla ïoh kam lang, hynrei kam long kumta kumba ka paw. Ngi ïohi pynban ïa ka jingbym kwah ka kompeni ban ïatreilang bad ki nongtrei bylla nongtrei surok bad ruh bad kiwei-kiwei ha kine ki sngi lei ngi ki kynhun seng ngi ïoh shibun ki jingpynsngew na uba bun balang ba katei ka kompeni ka don jingthmu ban ym ai lad shuh ïa ki nongtrei misteri, nongtrei bylla trai muluk ban ïa ïoh kam lang ha ka jingpyntrei ïa katei ka surok wat ha ki kam barit baria ruh kaba katei ka kompeni ka shait tyrwa ha ki,” ki la ong.
Shuh shuh ki la pynpaw ba mynta lei ki la sdang wan ïalam kham bun ïa ki bar jylla ban wan trei ha ka jaka ki trai-muluk – hato ki paidbah ki hun ïa kane ka jingkheiñ troiñ da katei ka kompeni ïa ki nongbylla jong ka dong ka thaiñ.
Khatduh khatwai, ka kyrwoh khubor na kitei ki ar tylli ki kynhun seng ka dawa na ki kompeni pyntrei ïa ki surok ba kin burom ïa ki kyndon treikam lada dei ha ki tnad Sorkar, ki tnad jong ka KHADC lyngba ki Hima, ki shnong ki thaw bad ka WKSU bad UHM kiba kyrshan radbah ïa ka jingpyrshah ba shongnia jong ka FKJGP West Khasi hills.
La kyrpad ïa ki paidbah ka thaiñ ban ïatreilang halor kitei ki jingeh kiba ki paidbah nongtrei bylla, nongtrei misteri, ki trai kali ki nongbylla ñiah kali ka thaiñ ki ïakynduh bad kyrmen lyngba ka jingïatreilang jong ki paidbah ka thaiñ ki briew ki ba wan trei na bar ka jylla ha kino-kino ki kam kin ym mlien ban shim kabu nangne sha khmat.
