Shillong, Risaw 23
Ki briew kiba don bynta ha ki tamasa kata, naduh ki nongrwai, nongtem, ki nongpynkhreh bad nongpynbit pynbiang ïa ki jingdonkam naduh ka jingpynsawa, bad jingpynitynnad ki la pynpaw ka jingdiaw lada shah pynthut noh kino-kino ki tamasa kiba la pynkhreh ban pynlong, la ka dei kaba pynbeit ban pynlong da ki riewshimet lane da ka Sorkar.
Haba twad jingmut na ki kynhun nongrwai bad nongtem kiba ju ïashimbynta ha ki tamasa bapher-bapher, ki la ong ba ki tamasa ha kane ka juk ki dei kiba plie lad ban ïoh kam bad ïoh kamai ki kynhun bapher-bapher kiba dei ban donbynta ha ki tamasa.
“Ym tang ba ïoh kam bad ïoh kamai na ki tamasa kiba la ju pynlong, ki tamasa ki long ruh ki rynsan ban pyni ïa ki sap kiba ki samla jong ngi ki don kum ki nongrwai, nongtem bad kiwei kiwei ki sap ban pynbyrngia,” la pynpaw uwei na kiba donbynta ha ka kynhun tem bad rwai.
Ki riewshimet kiba ju donbynta ban pynkhreh pynkhrum haba pynlong ïa ka tamasa, ki la pynpaw ba ki tamasa kiba kham heh lei lei ki dei kiba ailad ha ka kam ka jam namar yn ïoh ban shna ïa ki rynsan bad kiwei kiwei ki jingpynbeit pynbiang kiba donkam na ka bynta ban pynlong ïa ka tamasa.
Ki la ong ba haba pynlong ïa kano-kano ka jinglehkmen ne ka tamasa, ki don ruh da kiwei pat ki briew kiba pynbiang ïa ka jingsawa, ki jingpynitynnad ïa ki jaka ba pynlong ïa ka tamasa.
Ha kine ki bnai ka aïom tlang, ki don bun ki jinglehkmen bad ki tamasa kiba la pynlong ha kylleng ki jaka kynthup kiba pynlong da ka Sorkar bad riewshimet.
