Shillong, Risaw 25
Ka jinglilam ïa u dewïong ba la dep tih da ka Coal India Limited (CIL) ka la bteng biang ha kaba la leh lyngba ka ‘e-auction.’
Baroh u dewïong ba la dep tih uba la buh ban lilam, u long 5,92,645.385 Metric Ton (MT), bad tang na East Jaiñtia Hills district, u la jan kot 5 lak MT kata, 4,81,555.69 MT.
Na West Khasi Hills district, u don 40,862.4 MT, nangta 70,141.295 MT na South West Khasi Hills district bad tang 86 MT na South Garo Hills district.
Ïa u dewïong ba la buh ban lilam la pyni lut ki jingtip ba bniah naduh ka kyrteng ki trai dewïong bad ka district, ka jingbun u dewïong, ka jaka pynlang dewïong, bad ka jinglong u dewïong bad ka dor kaba la buh.
La kam ba u dewïong na Meghalaya uba la hap ban lilam lyngba ka CIL, u dei uba la dep tih naduh mynshwa hadien ba la khang ka NGT ban tih thymmai bad shalan.
Ha ka jingshisha, ha ki snem kiba la leit, ka Sorkar Jylla ka la ai jingkheiñ ba u dewïong ba la dep tih lypa bad lum thup ha kylleng ki jaka ba don ki par dewïong u don haduh kumba 32 lak MT.
