Shillong, Risaw 26
Kum shi bynta ban pynbeit thymmai bad pynlong ryntih ïa ki 29 tylli ki konstitwensi jong ka council, ka Khasi Hills Autonomous District Council (KHADC) ka la dep ban thaw ïa ka Delimitation Committee bad ka jingthaw ïa kane ka committee ka la long hadien ka jingaibor jong u Lat ka Jylla.
Na ka liang jong ka KHADC hadien ba ka la bishar bniah halor ki shithi ba ka la ïohpdiang na kiba bun tylli ki shnong halor ka jingdonkam ban pynbeit thymmai noh ïa ki konstiwensi ba kum ki shnong kin suk, ka la thoh bad phah da ka shithi sha u Lat ka jylla u Phagu Chauhan ban ïoh jingbit.
Ha kane ka shithi sha u Lat, ka KHADC ka la pynpaw ba ka la donkam ban pynbeit bad pynbiang tarajur ïa ka jingheh jingrit jong ki konstitwensi katkum ka jingdon jong ki nongthep vote bad ki shnong.
Ïa kane ka Delimitation Committee ba la thaw yn khlieh da u Nongbishar barim ka Ïingbishar District Council u Dr. S Kharsyiemlieh, bad ki dkhot pat ki kynthup ïa u Dr. S.L Marbaniang MLA barim, Kong R Myrboh kum nonghikai skul ba la shongthait, Dr. D.R.L Nonglait kum Prof. Dept of Khasi, NEHU bad Bah M Kharkrang Secretary barim ka KHADC kum u Secretary.
Haba ïakren bad ki lad pathai khubor ha ka Sngi Palei, u Deputy Chief Executive Member ka KHADC u Bah Pynshngaiñ N Syiem uba bat ruh ïa ka tnat Aiñ u la ong, “Kum ka Council ngi la ïohpdiang bun ki jingthoh na ki shnong bapher-bapher halor ka jingdonkam ban pynbeit thymmai noh ïa ki bad hadien ba ngi la peit bad bishar ngi la sngew dei bad dei halor kane, ba ngi la phah da ka jingthoh sha u Lat ban kyrpad ba un ai jingbit.”
U Bah Pynshngaiñ u la ong, ha u snem 2013, katto-katne tylli ki shnong ki la ai da ka jingthoh sha ka KHADC ban pynbeit ryntih noh ïa ka jinglong ki konstitwensi namar don ki shnong kiba ka jinghap ha ka konstitwensi bad ka jinglong kam ïahap, bad ha kaba u la kdew katto-katne ki jingthoh na ki shnong kum ka Mawkamah mynshwa ka hap ha ka Nongstoiñ Konstitwensi hynrei mynta ki la kwah ban hap noh ha Rambrai, ka Mawpat kaba hap ha Mawlai mynta ki la kwah ban hap noh sha Mawkhar-Pynthorumkhrah bad kumta ter ter.
“Hadien ba ngi la ïoh jingbit, ngi la thaw ïa ka Delimitation Committee ba la khlieh da kitei kiba la kdew haneng bad ka jingthmu ka long ban pynbeit ryntih noh ïa ki konstitwensi katkum ka jingdon ki shnong bad ki nongthep ‘vote’ ba kin ïabiang tarajur,” la ong u Dy CEM.
Haba kylli, la kane ka jingthmu pynbeit ryntih ïa ki konstitwensi kan ktah ne em ïa ka ilekshon MDC ka ban sa long ha u snem ban wan, u Bah Pynshngaiñ u la ong, “Kan nym ktah namar ka jingpynbna ban pynlong ïa ka ilekshon kam mih bad kumta kaba donkam mynta ka long ba ka Delimitation Committee kan hap ban ïaleh pynkloi ha ka ban pyndep ïa ka kam bad watla ym shym la buh katno ka por, hynrei la kyntu ban pyndep kloi katba lah.”
Ha kylli pat halor ka ‘amendment jong ka Khyrnit ba Hynriew ba lada ka ïoh jingmynjur ha kane ka Dorbar Parliament kan don jingktah ne em ïa ka jingpynbeit thymmai ïa ki konstitwensi namar yn hap ban pynkha shuh ki konstitwensi, u Bah Pynshngaiñ u la ong kan nym don jingktah hynrei kan ïarap shibun lada jia ba ha u Nohprah ka Dorbar Parliament kan ai jingmynjur ban wanrah ïa ka jingpynkylla ha ka Khyrnit ba Hynriew.
“Lada ka long kumta lei-lei kan nang pynsuk shuh shuh ïa kane ka committee naba kan nym treikam ban peit bad pynbeit ïa ki 29 tylli ki konstitwensi hynrei ban trei pynbeit na ka bynta ki 35 ne 37 ki ban wan katkum ka jingpynkylla thymmai ha ki kyndon jong ka Khyrnit ba Hynriew jong ka riti synshar ka ri,” la ong u Bah Pynshngaiñ.
