Shillong, Ïaïong 27
Ka jingkynjoh jingïarap ba kyrkieh kaba tang shisien sha u ‘Helpline’ ka ‘CM Connect’ (1971) jong ka Sorkar Megha-laya ka la ïalam sha ka jinglah ban pyllait im ïa uwei u khynnah rit na Meghalaya uba la sahkut bad shah kynnoh ba u la shah pynbor ban trei ha kawei ka jaka bam ha Kashmir, ha kaba ki bor ba dei khmih ki la shimkhia mardor tang hapoh ki kynta ban ïarap ïa une u khynnah.
Ha ka 24 tarik u Ïaïong, ka jingkynjoh jingïarap ba kyrkieh sha u nombor 1971, u ‘Helpline’ hapoh ka sienjam ba kongsan jong ka Sorkar Meghalaya – ka ‘CM Connect’, ka la sdang ïa ka jingtreikam kaba sted bad kaba ïatreilang na bynta ki kam pyllait im ha kylleng ki Jylla.
Uba ‘phone’ u la ïathuh ba uwei u khynnah rit na Meghalaya u la sahkut ha Kashmir bad la pynbor ïa u ban trei ha kawei ka jaka bam hapoh ki jinglong-jingman ki bym ïahap.
La kynnoh ba u la shah pyntrei palat pud, khlem ïoh tulop, bad shah lehbeiñ. Kaba sngew shyrkhei ka long ba u khynnah u la sdang ban pynpaw ïa ki jingmut ne ki dak ki shin ban pynmynsaw ïalade.
“Ha ryngkat ka jingsngewthuh ïa ka jingdonkam ba kyrkieh, ka ‘CM Connect’ ba la wanrah hapoh ka jingïalam jong u Myntri Rangbah ka Jylla, u Conrad K. Sangma mardor ka la shimkhia ïa kane ka kam lyngba ki lad bapher-bapher bad sdang ïa ka jingïatreilang bad ki bor ba dei khmih ka Jammu & Kashmir,” ong ka kyrwoh ha ka Lah Sngi U Blei.
Ki heh ophisar ki la trei miet la bad sngi, da kaba pynneh ïa ka jingïakren bad na sha shiliang ban pyntikna ïa ka jingshim ïa ki sienjam kiba kloi.
“Tang hapoh katto-katne kynta, ka kynhun ïatreilang kaba kynthup ïa u Assistant Labour Commissioner bad ka Anti-Human Trafficking Unit ha Jammu & Kashmir ki la lap ïa une u khynnah,” ong ka kyrwoh.
“La pyllait im ïa u na katei ka jaka bad la pynkynriah noh ïa u sha ka ‘Shelter Home’ jong ka Sorkar, ha kaba mynta u don hapdeng ka jingshngain.”
Ha kajuh ka por, la shimkhia bad leh ïa kaba donkam pyrshah ïa u nongai kam.
“La ujor ïa ka ejahar, la sdang ïa ka jingtohkit, bad la bthah ïa u nongai kam ban pynkhuid ïa baroh ki jingsiew kiba dang sahteng,” ka la bynrap.
“Kane ka jingjia ka pynpaw ïa ka jingtreikam jong ka ‘CM Connect’ kum ka rynsan ban ïatreilang bad ki nongshong shnong kiba shimkhia. Naduh ba la sdang ïa ka ha u bnai Rymphang, 2024, kane ka sienjam ka la ïarap ha palat 70,000 tylli ki jingjia ban ai jingkyrshan ïa ki nongshong shnong bad ïoh pdiang haduh kumba 20,000 tylli ki jingïakren, bad ka jingsngewhun ka la long haduh 95 na ka 100,” ong ka kyrwoh.
“Ka Sorkar Meghalaya, hapoh ka jingïalam jong u Myntri Rangbah ka Jylla, u Conrad K. Sangma, ka la pdiang ïa ka jingïatreilang kaba kloi bad ka jingkyrshan ba la kner – kaba long kaba kongsan ha ka ban pyntikna ïa ka jingpyllait im kaba shngaiñ ïa u khynnah,” la ong ka kyrwoh.
