Ka jingkynnoh u Bah Pynïaid ïa ka VPP ha Mawryngkneng ka dei tang ban pynthame ïa ki paidbah: Heavingstone

Shillong, Risaw 26

U MLA ka Voice of the People Party (VPP) na Mawryngkneng konstitwensi, Bah Heavingstone Kharpran u la ong ba ka jingkynnoh u Bah Pynïaid Sing Syiem, MLA barim ka Mawryngkneng bad MDC ba mynta ka Sohryngkham konstitwensi ba ka VPP ka ïatreilang bad ka TMC ha ka ilekshon MLA ba dang shu dep ka dei tang ka jingpynthame ïa ki paidbah.

U Bah Kharpran u la ong kumno u Bah Pynïaid un shu kynnoh ba ka VPP ka ïatreilang bad ka TMC haba ka TMC ka pynïeng la u jong u kyrtong ha ka ilekshon MLA ba dang shu dep.

“Ngim dei ban sngap ïa kita ki jingkynnoh namar kim don ki sakhi hynrei kane ka jingkynnoh ka dei tang ban pynthame ïa ki paidbah namar ka jingjop jong nga ha ka ilekshon MLA ba dang shu dep ka dei ka jingstad jong ki paidbah” u la ong.

U Bah Kharpran u la ong ba ka shap jong ka VPP kan dei hi u prah Khasi ym u prah West Bengal kumba la kynnoh da u Bah Pynïaid bad u prah Khasi un sa jop biang ha ka ilekshon MDC ha u snem 2024.

Haba kylli kumno ka jingpynkhreh ïa ka ilekshon MDC haba ïakhun pyrshah ïa u CEM ka KHADC, u Bah Kharpran u la ong lada dei ban ïakhun ïano-ïano ym dei ban kheiñ sting hynrei hap trei shitom ban rah ïa ka jingjop.

U la pynkynmaw ba ha ka ilekshon MLA ba dang shu dep u la ïakhun ïa u Bah Pynïaid Sing Syiem mynba u dang dei u MLA ka Mawryngkneng konstitwensi, hynrei mynta un ïakhun biang bad u (Bah Pynïaid) uba dei MDC bad CEM ka KHADC.

Kum ban shu pynkynmaw, ha kine ki bnai ba la dep u Bah Pynïaid Sing Syiem kum u CEM ka KHADC u la kynnoh ba ka jingjop u kyrtong ka VPP ha Mawryngkneng konstitwensi ka dei ka jingïatreilang bad ka TMC namar ki bun ki nongkyrshan ka TMC ki la leit kyrshan ïa ka VPP.

U la ong ba lada dei u prah na West Bengal un nym shan slem bad un sa khylliap lama noh ha ka ilekshon MDC.