Kyntu ka HANM ïa u CEM ban nym ai laisen khaïi lada ym ïoh NOC

Shillong, Risaw 26

Ka Hynñiewtrep Achik National Movement (HANM) South East Khasi Hills ka la kyntu ïa u Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem ba ym dei ban ai Trading License ne ka laisen khaïi sha ki bar jylla khlem da ïoh ka No Objection Certificate (NOC) na ki Khlieh Nongsynshar ne ki Dorbar Shnong kiba khaïi ha ka thaiñ Sohra-Majai.

Ïa kane ki nongïalam ka HANM South East Khasi Hills ki la kyntu ha ka Sngi Palei hadien ba ki la ïakynduh ïa u CEM ka KHADC, ha kaba ki la aiti ruh ïa ka dorkhas.

Haba kren sha ki lad pathai khubor, u Finance Secretary ka seng u Bah Dan Murphy Nongbri u la ong, ka jingkyntu jong ka seng ïa ka KHADC ka long hadien ba ka kynhun ki bar jylla kiba khaïi ha ka thaiñ, ki la leit ban mudui sha ka ïingbishar Meghalaya High Court pyrshah ïa ka Hima Sohra ba kam ai NOC.

U la ong ba ka ïingbishar lyngba ka hukum ha ka 4 tarik u Risaw 2023, ka la bthah ïa ki ba ki dei ban leit sha ka shlem treikam jong ka District Council ban shim ïa ka Trading License na u Secretary jong ka KHADC.

U Bah Dan Murphy u la ong, ka seng ka la ai da ka dorkhas sha u CEM ka KHADC ban pynpaw ïa ka jingpyrshah kaba jur ïa ka jingai Trading License ïa ki bar jylla ban khaïï-pateng ha ki jaka kiba hap hapoh ka jingkhmih u Syiem Sohra.

Une u nongïalam ka HANM u la ong ba ka KHADC kam dei ban ai laisen khaïi katba kitei ki bar jylla kim pat ïoh shwa ïa ka NOC na ki Dorbar Shnong kumba la kdew ha ka United Khasi & Jaiñtia Hills (Trading by Non Tribal) Regulation 1954.

U la buh ruh ka jingkyrpad ïa ka KHADC ba kan pyntreikam noh ïa ka United Khasi & Jaiñtia Hills (Trading by Non Tribal) Regulation 1954/59 kaba thoh shai ba ha ki jaka ba ki trai jylla ki lah ban trei ïa kano kano ka kam, ba kam dei shuh ban ai laisen khaïi ïa ki bar jylla lane wat ban pynthymmai ïa ki laisen ruh.

Shuh shuh u la ong ruh haba buddien ïa ka Legislation 6 Period of Validity of License (1), la shem ba la thoh shai ba ka por jong ka jingai laisen khaïi ka long tang na ka bynta shi snem, hynrei ka long kaba lyngngoh bad kaba pyni artatien ïa ka seng haba lap bad ïohi ba don ki laisen khaïi kiba ka KHADC ka la ai sha ki bar jylla na ka bynta 10 snem kata ba kin pynthymmai hadien 12 snem bad don kiba haduh 37 snem tam.

“Katkum ki kyndon jong ka Trading by Non Tribal, ka jingai lisen khaïï kadei ban treikam tang shi snem, hynrei ki don ki bar jylla kiba la ïoh ïa ka Trading License kaba treikam haduh 10 snem tam” la ong u Bah Nongbri bad kynnoh “Ki don ki ophisar jong ka tnat Trade ha u snem 2006-2007 ki la ai ïa ka Trading License ïa ki bar jylla kaba treikam haduh 10 bad don ruh kiba treikam haduh 30 snem tam”.

U la ong ba ha kane ka jingïakynduh, u CEM u la kular ba ka EC kan sa buddien halor katei ka jingai laisen bun snem bad kan sa leh ïa kaba donkam.