Shillong, Risaw 26
Ka Sorkar Jylla lyngba ka tnat pule puthi ka la nang shaid-shaid ban wanrah ki jingpynkylla ha ki kot pule bad lynnong kiba ju hikai ha ki skul bapher-bapher, ka la ïaid ban ïasyllok bad ki khliehduh jong ki skul na Rilum Khasi Jaiñtia.
U Myntri ka tnat pule puthi, u Rakkam A Sangma u la ong ba ha ka 18 tarik mynta u bnai u la ïoh ban ïakynduh lang bad ki khliehduh jong ki skul na Rilum Garo ha Tura ha kaba ki nonghikai ki la pynpaw ka jingsngewkhia haba ïadei bad ka jinglong jingman ki kot pule bad ki lynnong kiba dei ban ai jinghikai kiba long ïaryngkat lem bad kiwei pat ki bynta jong ka ri kiba la kham long shakhmat.
U la ong ba ha ka Sngi Thohdieng yn ïakynduh lang bad ki Principal bad Headmaster/Headmistress jong ki skul na Rilum Khasi ban ïakren bad sngap ïa ki jingai jingmut jong ki halor kane.
Halor ka Textbook Review Committee, u Rakkam u la ong ba kan sa don ka jingïakynduh kaba nyngkong eh ha ka 1 tarik Naiwieng ha kaba yn sa ïashimbynta lang ki riewshemphang bapher-bapher.
U Rakkam u la pynkynmaw ruh ïa ka jingkren ka Myntri ka tnat pule puthi na Finland kaba la kren shaphang ka jingshaniah markylliang hapdeng ka skul bad ki nonghikai.
U la pyni nuksa ïa ka Finland, kaba dei ka ri kaba biang bha ha ka pule puthi, bad kaba kongsan ka long ba ki nonghikai ha Finland kim donkam ban da thoh kyrteng ïa ki sngi ba ki wan hikai sha skul, hynrei ki pyndep ïa ka kamram da ka jingkitkhlieh.
Kumta u la ong ba ka Jylla ruh ka donkam ban don kajuh ka mynsiem ba ki nonghikai kin trei bad pyndep ïa ka kamram da ka jingkitkhlieh ban kyntiew ïa ka pule puthi.
