Srinagar:
Ka International Film Festival of Srinagar kaba la sdang naduh ka 25 tarik mynta u bnai la wan ban shim bynta da 200 ngut ki nongshna phlim ka ri ha kaba ha kane ka tamasa la iohlad ruh ban pyni ia ki 30 tylli ki phlim jong kiwei pat ki ri ka pyrthei.
Kane ka tamasa bakhraw jong ka Kashmir Valley mynta ka kynti ka kham heh ban ia ki snem ba la leit bad la ioh khubor ba haduh 16 tylli ki ri ka pyrthei ki la wan ban shim bynta lang.
Ka International Film Festival of Srinagar kaba ju pynlong shisien shisnem la sakhi ia ka jingwan shim bynta jong ki nongshna phlim ka Bollywood, South Indian Film Industry bad kiwei kiwei ha kawei ka rynsan ban pynshongkun ia ka.
Ha kane ka tamasa la wan ruh ban shim bynta lang da ki ri kum ka Argentina, Cuba, Russia bad UK. Kumba ka tamasa Cannes jong ka Italy, Toronto jong ka Canada bad ka Venice Film Festiva,l ka International Film Festival of Srinagar ruh ka long kaba kyrpang haduh katta katta ia ka ri India.
Ka jingpynlong ia kane ka tamasa ha Srinagar ha kawei ka liang ka long ka jingmyntoi bakhraw ia kane ka nongbah naba kane ka iarap ban kyntiew ia ka kam jngoh kai pyrthei bad kiwei kiwei.
Shuh shuh kawei ruh ka daw ba la pynlong ia kane ka tamasa ha Srinagar ka dei ruh na ka bynta ban khring ia kiba bun ki nongshong shnong jong ki ri ka pyrthei ban wan peitkai ia ki jaka ba itynnad kiba don ha kane ka nongbah.
Mynta u snem u shongknor ha kane ka tamasa u dei uwei na ki nongshna phlim bad direktor ka Bollywood u B Subhash uba direk ia ki phlim ba itynnad kiba kynthup ka Dance Dance bad Disco Dancer.
U Subhash ula ai jingiaroh bha ia ka Srinagar da kaba ong ba ka dei ruh ka jaka kaba la khring ia kiba bun ki nongshna phlim bad ba ka sorkar ka donkam ban shim ia ka jingkitkhlieh ban kyntiew ia kane ka nongbah ba itynnad.
Ha ki snem ba la leit bun ki phlim Bollywood la wan ban ring sha kane ka nongbah bad dei ruh lyngba jong kine ki phlim kaba la pynlong ia kiba bun ban kwah wan peitkai ia ka Srinagar.
