Shillong, Risaw 26
Ka Hynñiewtrep National Youth Front (HNYF) East Khasi Hills District ha ka 26 tarik u mynta u bnai sa shisien ka la pynlong ka jingkhynra ïa ki dukan thoh ‘teem’ kiba don ha Anjalee ter ter shaduh Khlieh Ïew.
Ha katei ka jingkhynra, ka seng ka la lap ba bun na ki dukan thoh ‘teem’ khamtam jong ki bar jylla kim don satia ïa ki kot ki sla kiba biang ne ka laisen kaba la pynlong ïa ka seng ba kan phah khang lut ïa ki dukan jong ki baroh.
Haba kren bad ki lad pathai khubor, u Bah Orester Mawlong uba dei u dkhot ka sengkmie, u la ong ba na ka liang jong ka seng kan nym shong kli-kti hynrei kan dang ïaid shakhmat ha kaba ïadei bad kane ka kam tat haduh ban da ïoh ïa ka jingjop.
U Bah Mawlong u la ong ba ka seng ka la maham tyngeh ruh ïa ki bar jylla ba lada kim pynbiang ïa ki kot ki sla kiba ïadei bad ki dukan thoh ‘teem’ nangne shakhmat, ka seng kan shu khang beit ïa ki dukan bad kan nym shah ba kin plie.
“Ngi la lap ba ki bar jylla hi kim don ïa ka laisen wat tang kawei ruh, ki la shu ïaleh khaïi-pateng da une u nombar ‘teem’, ngi na ka liang ka seng hi ngim lah shah ïa kane”, la ong u Bah Mawlong.
U Bah Mawlong u la ong ba ka seng teng-teng ka ju ïakynduh ïa ki Khasi lajong bad watla ka seng kam kwah ban ïasniew paradoh parasnam hynrei ka ïaleh ban pynsngewthuh ïa ki ba ki dei ban ïaid katkum ka aiñ khnang ba ka khajna ka dei ban poi sha ka sorkar jylla.
U Bah Mawlong u la ong ba katkum ka jinglap jong ka seng, ka la lap ba ki dukan thoh ‘teem’ hi ki la pynïaid beit da u nombar jong u Khasi Hills Archery Sports Institute katba ka laisen ka dei jong u Hynñiewtrep Indigenous Archery Organizers Institute.
Shuh shuh u Bah Mawlong u la ong ba kaba sngewlyngngoh ruh ka long ba kumno kitei ki dukan thoh ‘teem’ ki pynïaid ïa katei ka kam khlem kano-kano ka laisen kaba biang hynrei kitei ki dukan ki la ong ruh ba kim donkam ban pyndonkam da ka laisen jong ka ‘teem’ hynrei la tip hi da u Syiem.
Nalor kane, ka seng ka la buh jingkylli kumno u Syiem ka Hima Mylliem u lah ban pynkupbor ïa kitei ki dukan thoh ‘teem’ bad ha kano ka rukom u Syiem u ïa don bynta bad ki nongpynïaid jong ka ‘teem’. Ha kaba ïadei bad kane, na ka liang ka seng kan sa leit ban ïakynduh ïa u Syiem khnang ban ïoh ïa ka jingshai halor kane.
La ïohi ruh ba ha katei ka sngi kiba bun ki dukan thoh ‘teem’ ki la khang pynsted ïa ki dukan ha shwa ba ka seng kan wan poi ha katei ka jaka ban pynlong ïa ka jingkhynra.
