Shillong, Risaw 26
U Bah Prestone Tynsong uba dei u nongïalam ka seng National People’s Party (NPP) bad ruh Symbud Myntri Rangbah ka Jylla u la kren shai ba ka jingthaw ïa ka seng NPP ka long beit na ka bynta ban trei bad shakri ïa u paidbah ym pat ban dei kata ka nongthied (importer) lane ka nongdie (exporter) jong ki nongïalam saiñ pyrthei.
“Ngim dei ki nongthied ne nongdie ïa ki nongïalam saiñ pyrthei hynrei ngi dei ka seng NPP kaba ngi trei ban shakri bad peit ïa ka jingbit jingbiang jong ki paid nongshong shnong ka Meghalaya bad kumjuh ruh jong ka thaiñ shatei lam-mihngi,” la ong u Bah Prestone haba kren sha ki lad pathai khubor ha ka Sngi Palei.
Kane ka jingkynthoh jong u Bah Prestone ka la long hadien ba na ka liang jong u President ka Meghalaya Pradesh Congress Committee u Bah Vincent H Pala uba dei ruh u MP ka Shillong dang shen u la kynnoh pyrshah ïa ka NPP ba ka long ka seng kaba bunkam tang ha kaba leit khroh ne thied kyrtong na kiwei ki seng, kata kum na ka All India Trinamool Congress (TMC) bad ka Bharatiya Janata Party (BJP) na ka bynta ka ilekshon MP ka ban sa long ha u snem 2024.
Na ka liang une u nongïalam ka Congress hapoh Meghalaya u la kynnoh ruh ba ka NPP ka la leit ban ïakren bad khroh ïa u MLA barim ka Umroi u Bah George B Lyngdoh, uba dei ruh u nongïalam ka TMC ha Meghalaya.
Ha kaba ïadei bad ka jingkynnoh ba leit ïakren ka NPP bad u Bah George, u Bah Prestone u la ong ba um don jingtip satia halor kane ba u Bah George u lah ban wan ïasoh bad ka NPP, kumta kan bha palat ban kylli lem na u Bah Pala.
