Shillong, Risaw 27
Ki pulit ka Special Cell ka East Khasi Hills (EKH) ha ka Sngi Thohdieng ki la ïoh kem sa 4 ngut ki nongdawa pisa ba kynthup ïa kawei ka kynthei na Palace Hotel, Barabazar.
Na kitei ki 4 ngut la kurup ruh ïa katto-katne ki ‘counterfoil’ bad kawei ka kopi ‘receipt’ ha ka kyrteng ‘Ki Khlur u Hynñiewtrep’.
Ha kaba ïadei bad kane, la ïoh pdiang ruh ïa ka ejahar kaba kdew ba ki la dawa T. 15000/- ha ka janmiet 26 tarik bad leit lum ruh ïa ka pisa ha katei kajuh ka sngi.
Na ka liang ki pulit ki la pynngat ha ka jingujor ha thanat Lumdiengjri hapoh ki kyndon 384/ 506/34 IPC.
Kumban shu kdew hangne, ki pulit ka nongbah Shillong ha ka Sngi Palei ki la ïoh ban kem noh ïa 4 ngut ki briew katba ki dang sam ïa ki shithi dawa pisa sha kawei na ki dukan kaba don ha Khyndailad.
Ka jingïoh kem ïa kitei 4 ngut ka la long hadien ba ki pulit ki la ïoh jingtip ba ki don ki briew kiba ju leit ban dawa pisa na ki dukan ha Khyndailad bad Ïewduh.
Halor katei, ka pulit ka Special Cell, EKH ki la pynlong ka jingpynapshrip la bun sngi ha katei jaka bad dei ha katei ka sngi ba la ïoh ban kem noh ïa kitei 4 ngut na Khyndailad (Police Bazaar) katba ki dang sam shithi dawa pisa sha kawei ka dukan.
Ka jingïoh kem ïa kine ki briew, ka la pynpaw pyrthei ruh ïa ka kyrteng jong ki hynriew tylli ki seng ki bym pat ju bna satia ka kyrteng hapoh ka jylla ïa kaba la pyndonkam da kine ki briew ban dawa pisa.
Kine hynriew tylli ki seng ki dei ba la tip kyrteng kum ka Hynñiewtrep People Defence Alliance (HPDA), ka United Khasi Movement (UKM), ka Federation of Khasi United People (FKUP), ka Confederation of Meghalaya People (CMP), ka Khun Hynñiewtrep Youth Council (KHYC) bad ka Hynñiewtrep Youth Region (HYR).
Ha ka kyrwoh khubor ba la phah da u Superintendent of Police (City) ka East Khasi Hills u Bah Vivek Syiem u la ong, ha kaba ïadei bad kane, ki pulit ki la pynrung da ka Suo-Moto case pyrshah ïa kine 4 ngut ki briew ha thanat Sadar halor ki kam dawa pisa.
Ka tnad pulit ka buh ruh ka jingkyntu ïa ki paidbah bad ki nongkhaïi ba kin ai jingtip sha ki pulit khnang ba kin lah ban kem ïa kum kine ki briew bad ban pynngat ha ki kyndon aiñ.
