Shillong, Risaw 29
Da ki spah ngut ki dkhot jong ka Hynñiewtrep Achik National Move-ment (HANM) kin mih ha ka 1 tarik Naiwieng ban leit sha nongbah Delhi ban ïashimbynta ha ka jingïakhih na ka bynta ki mat ka jaitbynriew kiba dang sahteng khlem pat pynurlong da ka Sorkar Pdeng kiba kynthup ïa ka jingpyntreikam ïa ka Inner Line Permit (ILP) bad ban pynrung noh ïa ka ktien Khasi bad Garo hapoh ka khyrnit kaba phra jong ka riti synshar ka Ri India.
Ha u kyrwoh khubor ba la pyllait da u General Secretary ka HANM Bah Kyllang Thongni, la ong ba palat spah ngut ki dkhot ka seng kin hiar sha nongbah Delhi ha ka 1 tarik Naiwieng ban leit ïashimbynta ha ka jingïakhih da kaba shong kyllaiñ mungor ha Jantar Mantar ban dawa na ka Sorkar Pdeng ïa ki lai tylli ki mat kiba ktah ïa ka jylla Meghalaya. Kane ka jingïakhih kan long ha ka 3 tarik Naiwieng.
Ka HANM ka la ong ba kawei na ki jingdawa ka long ba ka Sorkar Pdeng ka dei ban burom ïa ka rai (resolution) kaba la mynjur da ka Ïingdorbar Thawaiñ ban pynrung noh ïa ka ktien Khasi bad Garo hapoh ka khyrnit kaba phra ka riti synshar jong ka Ri India kaba kum ka jaidbynriew Khasi bad Garo ki la dawa la slem bha namar ïa kine ki ktien la pule ha ki skulbah haduh ka kyrdan PhD.
Kaba ar ka long ba ka Sorkar Pdeng ka dei ban pyntreikam noh ïa ka ILP katkum ka Bengal Eastern Frontier Regulation Act, 1873 kaba ka Ïingdorbar Thawaiñ ka jylla Meghalaya ka la shim ïa ka rai ban pyntrei kam ïa kane ka aiñ ha Meghalaya ban ïada na ka jingwantur kyrthep ki briew na bar ka jylla.
Ka HANM ka la ong ba ïa kitei ar tylli ki rai kiba la pdiang da ka Ïingdorbar Thawaiñ ka jylla, ka Sorkar Meghalaya ka la dep ban phah sha ka Sorkar Pdeng, hynrei kaba sngewsih ka long ba ka Sorkar Pdeng hapoh ka jingïalam ka BJP kam shym leh ei ei haduh mynta.
“Ban kyrshan ïa ka jingdawa bad ka rai jong ka Ïingdorbar Thawaiñ ka Jylla, ka seng ka sngew ba kane kam kaba dei na ka bynta ka ïap ka im jong ka jylla ym dei ban shu kynton beit tang ha ka Ïingdorbar Thawaiñ ka jylla, hynrei kum ka seng kaba don ka jingkitkhlieh ïa ka jylla, ka hap ban leit ban pynlong ïa ka jingïakhih sha Delhi,” la ong u General Secretary ka HANM. U President ka seng, Bah Lamphrang Kharbani, u la dep kren ba ban ïakhih ha Shillong ka ktah ïa ki paidbah, bad kane ka kam kaba sah ka dei ha ka Sorkar Pdeng. Kumta ka seng ka la shim ïa kane sienjam ban leit sha nongbah Delhi ban pynlong ïa ka jingïakhih ban pynpaw sha ka Sorkar Pdeng ba ki paidbah ki donkam ïa ka jingïada.
