Shillong, Risaw 29
U MDC ka Mawsynram konstitwensi, Bah Alvin Sawkmie u la ïathuh ba ka jylla Goa ka don kumba 20 lak ngut ki nongshong shnong, hynrei ki nongjngoh kai pyrthei kiba wan sha kane ka jylla ki long palat 70 lak ngut ha ka shi snem. Kumta ïa ka jaboh ba pynjakhlia da kine nongjngoh kai la saiñ ban lah pynkylla sha ka bording khnang ban ïoh thang ki paidbah.
Ïa kine ki kyntien u Bah Alvin Sawkmie u la kren kum u kongsan ha ka jingïalang ban aiti ïa ka kali kit ñiut kaba la mang da ka KHADC lyngba ka Tied Grant jong ka 15th Finance commission 2020-21 sha ka Dorbar Shnong Mawsynram kaba la long myn ha ka 28 tarik mynta u bnai Risaw.
Ha kane ka sngi la ïadonlang u Bah HM Shangpliang uba dei u MLA barim ka Mawsynram konstitwensi, ki nongkitkam shnong bad ki longkmie longkpa.
Hashwa ban aiti ïa ka kali kit ñiut sha ka Dorbar Shnong Mawsynram ha ka por mynstep, ki nongshong shnong ki la ïa mih paidbah ban pynkhuid ïa ki ñiut ki ñier ha ki lynti syngkien, ki nala bad ki surok shnong.
U Bah Alvin Sawkmie u la ïathuh ba ha kine ki sngi haba ka kynhun na KHADC ki leit sha Goa ki la ïoh ban leit jurip ïa ka jaka theh ñiut.
U la ong ba ha Goa ki nongshong shnong ki don kumba 20 lak ngut tangba ha ka shisnem ki nongjngoh kai pyrthei ki don palat 70 lak ngut, hynrei ïa ki jaboh kaba mih na ki nongjngoh kai pyrthei ki la pynkylla sboh bad ki pynkylla ruh sha ka bording ban die sha ka sorkar bad ka sorkar ka die sha ki paidbah ba kin pyndonkam.
Kumta u la ong ba ka jingbret ñiut bret jaboh pathar ka la buh jingeh ïa ka jylla namar ki briew ki pynkhuid tang ha ka ïing lajong katba ki pynjakhlia haba ki la mih shabar.
Namar kata, ban wanrah ïa ka khuid ka suba, ka KHADC ka la wanrah ïa ka Solid Waste Management Act ban shna biang ïa ki kyndon ban pynkhuid ïa ki shnong ki thaw.
Katba u Bah HM Shangpliang u la buh thong ban wanrah da ka Market Complex ha Mawsynram ban pynheh ïa ka jaka ïadie ïathied ki nongshong shnong kiba wan na kylleng ki shnong.
U la pyntip ba ïa ka Market Complex donkam ban shna noh ïa ka Detail Project Report ban phah sha ka sorkar jylla bad un sa buddien bad u Bah Alvin Sawkmie shaduh Delhi khnang ban ïoh mang pisa na ka Sorkar India.
Nalor kata, u la ong ba ka ïew Mawsynram ka long kaba la rim bha namar kiba wan ïew ki long na kylleng ki shnong khamtam na ki shnong thaiñ war hynrei katkum ka por ka la khapngiah bad la donkam ban wanrah noh da ka iew kaba la shna kyrpang ne ka Market Complex kaba la biang lut ki jingtap bad ki jingker kiba biang.
Ha kajuh ka por u la pynpaw ba hadien hynriew bnai ba la dep shna ia ka surok na Mawphlang shaduh Weiloi bad yn bteng biang na Weiloi shaduh Phlangwanbroi ki nongjngoh kai pyrthei kin sa wan ban jngoh ïa ka Mawsynram namar ka jingduna ha kine ki sngi namar ka jingsniew palat ka surok.
U Bah HM Shangpliang u la ong ba ka Mawsynram ka dei kawei ka jaka jngoh kai pyrthei kaba paw ha pyrthei namar ka jingjur u slap. Namar kata, u kyrmen ba ynda la shna bha ïa ka surok kin sa bun ban wan kai sha ka thaiñ.
