Shillong, Risaw 30
Ka Sorkar Jylla ka la wanrah ïa ka Meghalaya Residents Safety and Security Act, 2016 da ka jingthmu ban pyntikna bad kyntiew ïa ki lad jingïada na bynta ki paid nongshong shnong ka Jylla da kaba pynleit jingmut bad khmih bniah ïa ki nongshong wai kiba shong ba sah ha ka Jylla.
Ka jingpyntreikam ïa kane ka aiñ kan khang lad ïa kino-kino kiba leh kam be-aiñ ban ïoh jaka sah hapoh ka Jylla, bad thaw ïa ka mat treikam ka ban tehlakam bad peitngor ïa ka jingwan rung be-aiñ kumjuh ka jingwan sah be-aiñ kiba nabar ha ki shnong bapher-bapher.
Khnang ban pyntreikam ïa kane ka aiñ, ka Sorkar ha ryngkat ka jingïasnoh kti lang bad ka NIC, Meghalaya ka la sdang ïa ka jingpynrung kyrteng ‘online’ ha ka 08.09.2022 – ka ban ai jingbit ïa ki nongshong shnong (trai ïing/nongshong wai) ban pynrung kyrteng ïalade da kaba pynshisha shuwa bad ki bor shnong.
Kumta baroh ki trai-ïing, nongshong wai kiba shong ba sah ha ki 7 tylli ki shnong – Nongrim Hills, Pohkseh, Nongrah, Nongmensong, Lapalang, Riat Laban bad Wahdienglieng ki la shah jied ha ka kylla banyngkong bad ki hap ban pynrung kyrteng ïalade khlem pep ha ka ‘app’ lyngba u URL https://megrssa.nic.in kaba lah ban leh ruh na ki ‘PC’, ‘Laptop’, ‘Tablet’ bad ‘Smart Phone’.
Shuh shuh ki trai-ïing bad ki nongshong wai ki lah ban pynrung kyrteng lyngba ka ‘mobile app’ kaba lah ban ‘download’ na katei ka ‘website’ kaba la kdew haneng.
Ki kot ki sla ba donkam lem bad kiwei-kiwei ki jingtip lah ban ïoh pdiang na ka shlem treikam Deputy Commissioner, East Khasi Hills, Shillong bad na ki Rangbah Shnong.
