Shillong, Risaw 30
Ki nongtrei kiba donbynta ha ka koit ka khiah kiba la tip kum ki Accredited Social Health Activist (ASHA) ki la sdang ïa ka jingïakhih da kaba shongthait ha la ïing kum ka jingpynbor ïa ka Sorkar Jylla ba kan pynurlong ïa kiba bun ki jingdawa kynthup ka jingpynkiew ïa ka bai siew kaba shisien shibnai.
Kane ka jingïakhih da kaba shongthait ha la ïing ka la treikam naduh ka sngi nyngkong bad kan bteng haduh ka 6 tarik Naiwieng.
Kine ki ASHA ki la wan lang hapoh ka kynhun Meghalaya ASHA Workers’ Union (MASHAWU) ban dawa na ka Sorkar Jylla ban pyntreikam ïa ki jingdawa kiba hakhmat eh kiba kynthup ïa ka jingpynkiew ïa ka bai siew kaba long T.2000 shibnai, ban pyntreikam lane pynrung lang ïa ka skhim ïoh jingsumar ei na ka bynta jong ki hapoh ka MHIS ne kiwei kiwei pat ki skhim.
Ha ka por mynstep ha ka sngi nyngkong, ki ASHA ki la ïakynduh ïa ka Myntri ka koit ka khiah ka Kong Ampareen Lyngdoh bad ki la pynkynmaw ïa ka, ba ki la dep wanrah ki mat jingdawa kham mynshwa hynrei kam shym la ai kano-kano ka kular lait noh tang ba ka kular ban ïakren bad u Myntri Rangbah ka Jylla.
Hadien ka jingïakynduh bad ka Kong Ampareen, ka nongaibuit ki ASHA ka Kong Sony Kharjana ka la ong ba ki mat jingdawa ki kynthup ïa ka jingdonkam ban kyntiew noh ïa ka bai siew na ka T.2000 shibnai bad ban pyntreikam ïa ki jingmyntoi lyngba ka MHIS bad kiwei ki skhim.
Ka Kong Kharjana ka la ong ba dei ban pynsangeh ïa ka jingshah weng khlem nongrim ki ASHA namar ki don ki khep ba shahweng noh tang namarba don ki daw shimet bad u Rangbah Shnong.
Ka la ong ba ka Myntri ka la kular ban lum jingtip na ka tnat ka koit ka khiah haba ïadei bad ki ASHA ban pyntreikam ïa ka skhim MHIS na ka bynta jong ki.
Ka Kong Kharjana ka la ban jur ban pynkiew ïa ka bai siew sha ki nongtrei ASHA khnang ba kin lah ban im ka jingim ha kum kane ka por ba la kiewdor lut ki marbam mardih.
Ka Kong Kharjana ka la ong ba na ka liang ka Myntri kan sa rah ruh sha u Myntri Rangbah u Conrad K Sangma haba ïadei bad mat ban pynkiew ïa ka bai siew na ka bynta ki ASHA.
Kumta, ki nongtrei ka ASHA ki la rai ban pynlong ka jingïakhih da kaba shongthait ha la ïing khlem leit ai ka jingshakri tat haduh ban ïoh ïa ka jingmih na kane ka jingïakhih haduh ka 6 tarik Naiwieng.
