Shillong, Risaw 30
Ka Sorkar Jylla ka dang ïakren biang bad ka National Thermal Power Corporation (NTPC) ban ailad siew kham bunsien ïa ka ram kaba la sahteng la kham slem kumba T.565 klur.
Ha ka jingshisha la ailad ïa ka Meghalaya ban siew kumba 20 sien siew ïa ka ram kaba T.565 kaba long T.28.25 klur shisien siew.
Ka tyllong khubor ka ïathuh ba ka Sorkar ka dang ïakren bad ki bor bahalor ka NTPC ban dang ailad shuh ban siew kham bunsien.
La ong ba da kaba kham ailad bunsien ban siew ïa ka ram, kan kham pynsuk ïa ka Sorkar ban siew shisien shibnai.
“Lada lah ban ailad ban siew kumba 30 lane 36 sien siew, kan long ka jingïarap ïa ka Jylla namar lada dei ban ïohlad ban siew haduh 30 sien, ka ram kan poi kumba T.18 klur shibnai,” la ong ka tyllong khubor.
Ka Meghalaya Energy Corporation Ltd (MeECL) ka la soi ïa ka soskular bad ka NTPC naduh u snem 2007, bad ka Sorkar kan hap ban siew haduh 25 snem kaba sdang naduh u snem 2017.
