Shillong, Risaw 30
Ha ka janmiet jong ka Lah Sngi U Blei ka la mih ka jingïapyni nia hapdeng ki paid nongshong shnong ka shnong Muktapur bad ki shipai khappud ka Border Security Force (BSF) halor ka jingkynnoh ba ki BSF ki la shah ïa uwei u khynnah ba dang 14 snem ka rta.
Katkum ka jingtip ba la ïoh la kynnoh ba uwei u khynnah uba dang 14 snem ka rta uba dei u nongshong shnong ka Muktapur; kaba dei ka shnong kaba don ha khappud India bad Bangladesh, u la shah shoh ha ki shipai BSF haduh ba u la mynsaw malu-mala.
Kumta na ka liang ki nongshong shnong mar ïa ïoh jingtip halor kane ka jingjia ki la mih paidbah bad ban pyni nia bad ki shipai BSF kiba don ha katei ka shnong. Nalor nangta, ki la kyntu ba dei ban khot bad wanlam shakhmat ïa uta u shipai BSF uba la donkti ban shoh ïa une u khynnah na ka bynta ban kylli ïa ka daw kaei kaba la pynlong ba un ktah kti.
Hynrei na ka liang jong ki BSF ki la kyntait mardor bad ki la ong ba kam shym la don satia ka jingktah kti; bad lada dei ba ki shoh, kin nym ïeng ne don satia ha kane ka jaka.
Lah ban kdew hangne ba ka shnong Muktapur ka dei ka shnong ha kaba la ju mih bun ki jingkulmar hapdeng ki paid nongshong shnong bad ki BSF bad kumjuh ruh wat ki shipai BDR na Bangladesh, naba ka dei ka shnong kaba don ha syndah bad ka Bangladesh.
