New Delhi, Risaw 30
U Myntri Rangbahduh ka Israel, u Benjamin Netanyahu, ha ka Lah Sngi U Blei u la ong ba ka jingsangeh ïasiat kan ym urlong satia namar kane kan dei kum ka jingpyndem hakhmat ka Hamas.
Haba kren sha ki lad pathai khubor, u Netanyahu u la ong ba kiwei pat ki Ri ki dei ban kham ai jingïarap ha ka jingïakhun ban ïoh pyllait ïa palat 230 ngut ki briew kiba la shah rahbor ha ka Hamas ha ka por ba ka la wan ban thombor ha ka 7 tarik Risaw. U la ong ba ki Ri ki dei ban dawa na ka Hamas ban pyllait mardor ïa kine kiba la shah rahbor khlem da buh satia ïa kino-kino ki kyndon.
Lah ban kdew ba ki lehnoh ka Hamas ki la wan hiar thma na Gaza Strip ha ka 7 tarik Risaw ïa ki bynta ba Shathie jong ka Israel bad haduh mynta, palat 1,400 ngut ki briew ha Israel ki la shah pynïap bad palat 230 ngut kiwei pat ki la shah rahbor.
Na ka liang ka Israel ka la kput kylla ïa ka Hamas da kaba leit ther bom ïa ka Gaza Strip ha kaba da ki hajar ngut ki briew ki la shah pynïap.
