Shillong, Risaw 30
Ka Board of Assembly Institute of Music, Shillong jong ka Jingïaseng Samla KJP Assembly, ka la ïoh ban sei kumba 295 ngut ki nongpule kiba la pyntbit ïalade ha ki solfa notes, ha ka tem ka put, bad kiba la ïohpdiang ruh ïa ki syrnod ba ki la pyndep ïa ka jingpule jong ki, ryngkat bad ka jingpynkup burom.
Ïa ka jingïalang pynkup burom ïa kitei ki nongpule la pynlong ha ka 28 tarik Risaw, 2023, ha Synod College, Shillong, ha kaba u MLA/MDC jong ka Mawhati, Bah Charles Marngar u la ïadonlang kum u Kongsan, bad uba dei ruh u nongpule barim jong kane ka shlem ai jinghikai.
Ha kane ka sngi la wan ban sakhi lang u Tbn. EW Kharsohnoh, uba long u Director katei ka jaka pule lem bad kiwei kiwei ki nongïalam, ki nonghikai jong katei ka shlem ai jinghikai, ki nongïalam Balang kiba kynthup naduh ki Pastor, ki Tymmen Basan bad kumjuh ki kmie ki kpa jong ki khynnah pule.
Ha kane ka sngi ka Board of Assembly Institute of Music, Shillong ka la pynkup burom ïa ki samla pule ha ka Ksing-Duitara Music Diploma ha kaba ki don 5 ngut, ha ka Staff Music Theory Certificate ki long 26 ngut bad ha ka Tonic Solfa Music Diploma ki long Grade A 11 ngut, Grade B+ 41 ngut, Grade B 87 ngut, Grade C+ 78 ngut, Grade C 42 ngut, Grade D+ 4 ngut bad Grade D iwei, kumta baroh lang kiba la shah pynkup burom ki long 295 ngut.
