Shillong, Risaw 31
Ban peit ïa ka jingbit jingbiang bad ka jinglong shngaiñ jong ki nongwan shangkai pyrthei shapoh ka Meghalaya, ka tnat Jngohkai ka jylla ka la don ka jingthmu ban buh noh da ki ‘Tourist Body’ ki ban peit bad khmih.
Nalor ka ‘Tourist Body’ ka tnat ka don jingthmu ruh ban wanrah da ka kpait-saiñ-kam (policy) bad ka aiñ ka ban mana ban tei jingtei ha ki katto-katne ki jaka jngoh kai kiba don ha kylleng ka jylla Meghalaya bad ka ban pynneh ïa ka jingitynnad jong ki jaka jngoh kai.
Ïa kane la pyntip da u Myntri ka tnat Kam Jngoh kai pyrthei u Bah Paul Lyngdoh haba kren sha ki lad pathai khubor hadien ba la wai ka Consultation Workshop ba la pynlong ha ka Sngi Ba-ar ha Pinewood Hotel.
U Bah Paul u la ong ba ka jingthmu ban wanrah da ka kpait-saiñ-kam ka dei na ka bynta ban pynneh pynsah ïa ki jaka ba itynnad hapoh ka jylla baroh kawei bad ruh ban don ki jaka ha kaba kan don ka jingkham pyrkhing ïa ka rung ka mih.
U Myntri u la ong ba na ka liang ka tnat jngohkai pyrthei ka don ruh ïa ka jingthmu ban buh noh da ka Tourist Body na ka bynta ban peit ïa ka bha ka miat bad ïa ka jinglong shngaiñ ki nongwan shangkai pyrthei kiba wan sha Meghalaya.
U Myntri u la pyntip ba ha kiwei ki jylla hapoh ka Ri India la sakhi ba ki don da ki ‘Tourism Police’ na ka bynta ban peit ïa ka bha ka miat bad ka jinglong shngaiñ ki nongwan shangkai hynrei haba phai pat sha ka Meghalaya, la sngew dei bad ïahap ban don da ka Tourist Body.
“Na ka bynta ban pynneh pynsah ïa ki jaka ba itynnad ha Meghalaya, ka sorkar kan wanrah syndon da ka Bill hapoh ka ïingdorbar thawaiñ bad ka kpait-saiñ-kam, kiba mana ban tei jingtei, ban tih marpoh khyndew lane ban tei ïa ki karkhana Coke ha kum kine ki jaka,” ong u Bah Paul.
Nalor kane, u la pyntip ruh ba ka jingdon ïa ka polisi bad ka aiñ kan ïarap ruh ïa ka sorkar ban pynbna ïa ki katto katne ki jaka hapoh Meghalaya kum ki ‘Eco Sensitive Zone’ bad ha kum kine ki jaka, yn pyrkhing ruh ïa ka rung ka mih ki briew.
