Shillong, Risaw 31
U President ba dang shah jied thymmai ka NPP Meghalaya Unit Bah Prestone Tynsong u la pyntip ba ha u Naiwieng ka seng kan sa pynbna noh ïa ki kyrteng jong kyrtong ban ïakhun ïa ka ilekshon MP Lok Sabha na Shillong bad Tura konstitwensi.
Haba ïakren bad ki nongthoh khubor ha shlem treikam ka NPP ha Lachumiere, u Bah Prestone u la pyntip ba un pynthymmai lut ka rukom treikam hadien ba u la shimti kum u President khnang ban pynkhreh ruh ïa ka ilekshon MDC ban long la shem snem.
Hadien ba u la shimti kum u President un sa pynthymmai lut ïa ki committee naduh ka Meghalaya Unit, District bad sha ki Block khnang ban pynkhreh ïa ka ilekshon MDC bad MP Lok Sabha ban long la shem snem.
U la ong ba kane ka jingpynthymmai ïa ki committee ka long khnang ba ka jingtreikam kan da poi sha man ki thliew ïing sha sor ne nongkyndong jong ka jylla baroh kawei.
“Ngin nym thiah ngin ym dem ngin trei shitom haba ka ilekshon ka la jan” u la ong
Haba ïadei bad ka Tura konstitwensi kaba ka MP ba mynta ka dei ka Agatha Sangma, hynrei u Bah Prestone u la ong lada dei ka MP ba la don lypa ne bym pat don hap ïaid katkum ki kyndon jong ka seng.
U Bah Prestone u la ïathuh ba ki la don ki kyrtong kiba pan tiket na ka bynta ka ilekshon MP na Shillong konstitwensi tangba um kwah ban ïathuh kyrteng.
Haduh mynta ki seng saiñ pyrthei kiba la pynbna kyrtong ki long ka Congress kaba la don lypa ïa u MP u Bah Vincent Pala, ka VPP, katba ka UDP, NPP bad BJP ki dang shong pyrkhat ban sei ïa u kyrtong.
