Shillong, Risaw 31
U Symbud Myntri Rangbah ka Jylla, Bah Prestone Tynsong u la shimti kum u State-President bathymmai ka National People’s Party (NPP) ha ka jingïalang kaba la long ha shlem treikam ka seng ha ka Sngi Ba-ar.
“Ka jingkylla kan sa wan mardor, ngi donkam eh ban wanrah jingkylla bad nga kyrpad ïa baroh ki nongïalam ba rangbah jong ka seng – ha kano-kano ka bynta ba la bynshet kam ïa phi, ngin ïatrei shitom,” la ong u Bah Tynsong haba kren ha ka jingïalang.
U la pynpaw ba ka jingangnud ba hakhmat eh jong u ka long ban pyndep noh shuwa ïa ka shlem treikam bathymmai jong ka seng.
U la ong ruh ba hapoh ka jingïalam u National President ka seng, u Conrad K. Sangma, u kyrmen skhem ba ka NPP hadien-habud kan sa synshar wat ïa ka Thaiñ Shatei Lam Mihngi baroh kawei.
“Katkum ka Riti Synshar ka seng bad kum ka jingïoh jngai u nongïalam ba la khlad noh, P.A. Sangma (Bam Kwai ha Dwar U Blei), u kwah ban thaw ïa ka seng ka ban don ïa ka phang pdeng – ka jingïalong kawei jong ki Jylla ka Thaiñ Shatei Lam Mihngi,” u la ong.
U Bah Tynsong u la ong ruh ba hapoh ka jingïalam u Sangma, ka seng kan ïai bteng ban trei bad shakri hok ïa ki paid nongshong shnong ka Jylla wat hapdeng ki jingtynjuh bapher-bapher.
“Ka jingkyrpad jong nga ka long sha baroh ki nongïalam ba shen ngin pynthymmai biang ïa ka komiti bad ym tang hapoh ka Jylla, nga kwah ban ïohi ba ngi pynkhlaiñ ïa ka seng ha man la ki distrik ha kylleng ka Jylla,” la ong u State-President bathymmai.
“Ngi kwah eh ban pyntikna ba ka seng jong ngi kan poi shaduh ki shnong ki thaw. Ym dei ban don mano-mano ruh ban ong ba ka NPP ka don tang ha Shillong, Tura ne Jowai, ka dei ban long haduh ki shnong ki thaw,” u la ong.
Ha kajuh ka por, u la ban jur ba kum u nongïalam u shim ka jingkitkhlieh bad un nang ïai trei shitom khamtam namar ka jingjan jong ka ilekshon kaba ka Jylla kan sa ïoh – MP & MDC.
“Kine ki dei ki 2 tylli ki jingtynjuh hakhmat jong ngi. Kumta nga kyrpad ba ngin trei minot khlem shongthait. To ngin pyntikna ba ka NPP sa shisien ha kine ki ilekshon kan wan biang ha ka bor la ka dei ha ki District Council ne ha ka ilekshon MP (Shillong & Tura), ngin poi sha ka thong,” la ong u Bah Tynsong.
Na ka liang u President barim ka NPP, Dr. W.R. Kharlukhi haba ai jingkren u la pynpaw ka jingsngewkmen ïa ka seng kaba la ai ha u ïa ki kabu khamtam ïa u nongïalam ba la khlad noh, u P.A. Sangma (Bam Kwai ha Dwar U Blei) uba naduh u snem 2008 u la tyrwa ïa u ban long MP sha ka Rajya Sabha watla um shym la treh bad rai ban neh beit ha ki kam saiñ pyrthei hapoh ka Jylla.
“Nga sngewkmen shi kat dei ban ïadon bynta bad kane ka seng bad nga la shakri la kumba 16 snem kum u President bad nga sngew ba ka la dei por. U Blei u la kyrkhu ïa nga namar wat hapdeng kiba bun ki jingtynjuh, hapoh ka jingïalam u Conrad Sangma, nga tikna ba lada u nang shisha ban pyrkhat haba ïadei bad ki kam ki jam, ngi sa wan biang ha ka sien kaba lai khlem pep,” la bynrap u Dr. Kharlukhi.
Shuh shuh u la ai khublei ïa u President bathymmai ka NPP bad kular ba kum u MP un ïai don ryngkat ban ïatreilang bad ka seng.
Ha kane ka sngi, la ïadonlang ruh u Myntri Rangbah ka Jylla bad National President ka NPP, u Conrad K. Sangma, ki Myntri Sorkar, MLA, MDC ka seng, ki nongïalam bad nongkitkam na bynta ki bynta bapher-bapher ka Jylla nalor kiwei-kiwei.
